Ka jingpynkhih ïa ka bhah thung kam ka lah ban wanrah jingduhnong: Bernard

Shuh shuh u la bynrap ba dei ban ïatreilang hapoh bad ban pynbeit ïa ki jingïapher da kaba suk ba saiñ.

Shillong, Jylliew 02:

U nongïalam ka Bharatiya Janata Party (BJP) hapoh ka Jylla, u Bernard N. Marak u la ong ba ka jingpynkhih ïa ka bhah thung kam ka lah ban wanrah ïa ka jingduhnong kaba khraw ïa ki 3 tylli ki jaidbynriew hapoh ka Jylla.

“Ha Meghalaya, ka bhah kam kaba 80% na bynta ki jaidbynriew Garo, Khasi bad Jaiñtia ka long jingpynwandur kaba kham pher bad ka bym dei ban pynkhih ïa ka,” la ong u Marak ha ka kyrwoh khubor.

U la ong ruh ba ka la wanrah ïa ka jingïabiang tara sha ki 3 tylli ki jaidbynriew na bynta 50 tylli ki snem bad ka jingpynkhih ïa ka, ka lah ban wanrah ka jingduhnong kaba khraw ïa ki 3 tylli ki jaidbynriew lada ki nongïalam kim ïohi lypa ïa kane.

“Ïa ka bynta ba ïadei bad ka aiñ dei ban pyntip sha man la ki dkhot jong ki lai jaidbynriew naba i jingpynkylla barit eh i lah ban ïalam sha ka jingduh jong ka 30% na ka 80% kaba ngi ïoh mynta,” u la ong.

U Marak u la ong ruh ba ki jaidbynriew Garo, Khasi bad Jaiñtia ki dei ban ïeng tylli lang kawei ban pynneh ïa ka bhah kaba 80% na bynta ka bha ka miat jong ki samla na ki lai tylli ki jaidbynriew.

Shuh shuh u la bynrap ba dei ban ïatreilang hapoh bad ban pynbeit ïa ki jingïapher da kaba suk ba saiñ.

“Ki Garo kim shym la dawa bun hynrei ka la don ki jingbym biang ha ki por ba la leit kaba ngi kwah ban pynshisha ïa ki. Ka jinglong-jingman hapoh ka Jylla ka lah ban kdiah ïa ka jingïatylli bad pynthut ïa ka shong suk shong shngaiñ,” u la ong.