Shillong, Rymphang 23
Ka lympung thohdur ki barikor ba la tip da ka Ramkinker Baij Memo-rial Art Camp la pynlong ha Prakriti Bhavan, Santiniketan naduh 16 tarik haduh 21 tarik Rymphang, 2025. Kane ka lympung Thohdur ka dei ka rong ka taw ban ïa sam jingtip bad ñiewkor markylliang ïa ki deiriti bapher ha Ri India ba la pynbeit da ka Santini-ketan Kala Bhavan Prak-toni bad Riti Academy of Visual Arts, Shillong.
Ha u bnai Nohprah 2023, la pynlong ïa ka Thoh Shun Art Camp ba la pynbit pynbiang da ka Riti Academy ha NEHU Salonsari, Shillong bad mynta ka kynti ka Santi-niketan Kala Bhavan Praktoni ka la pynbiang ban wer khatsaw ngut ki barikor ka Riti Academy na Shillong ban shim bynta ha ka Ramkinker Baij Memorial Art Camp.
U kongsan ha kane ka rong ka taw thohdur, u Dr Asok Das, u barikor ba pawnam ha Ri India bad Director ba mynshwa jong ka Jaipur City Palace Museum ha ryngkat ka Kiran Thaker, ka nongshtahdur ba pawnam bad ka samla ba la shah hikai ha u Ramkinker Baij ki la ïadon ryngkat bad u Dr Janak Jhankar Narzari bad Bah Raphael Warjri.
Ha ka jingkren jong u kongsan u la kynthoh halor ka rukom pynïaid ïa ki lympung treilang ki barikor ha ka thohdur ka ba la ïai kylla dur na kawei ka phew snem sha kawei pat na ka daw ka jingsan stet bad kiew irat ka stadtip katkum ka juk. U la ïaroh ïa ki nonghikai jong ka Kala Bhavan, Viswa Bharati University kaba dei ka salonsari ba pawnam tam ha Ri India ba ki kloi ban ïatreilang bad ki samla pule thohdur jong ka jylla Meghalaya. U la ban jur halor ka jingdonkam ban pynsngew ïa ki shnat Sorkar kiba dei ban tei ïa ka kam thohdur, khnang ba ka thohdur kan long kaba ïai phuh ïai phieng manla ka por.
Ha ka kylla step la pynwai da kaba ki kynrem lyndan ki la pyllait ïa ka kot ba ai kyrteng KOT Khasi Old Testament ba la thoh da u Bah Raphael Warjri, kaba dei shaphang ki khanatang bad puriskam Khasi da ka ktien phareng ba la byntrap ruh da ka phawar ha ka ktien Khasi.
Ka Synjuk ki barikor Khasi, Riti Academy ka la jied khatar ngut ki barikor na jylla Meghalaya bad arngut na jylla Assam, kata u Manoj Roy bad ka Paran Banti Devi. Ki barikor na jylla Meghalaya ki kynthup ïa u Bah Raphael Warjri, Imogen Wahlang, Pringsrang W Sangma, Rickyshi Suiam, Baniarjingmut Lyngdoh Mawphlang, Clive Steven Kharphuli, kynthup ruh ia ki samla pule na jylla kiba dang pule ha Kala Bhavan ba kynthup ïa u Wanhi-I Challam, Rekilbert Lyngdoh Mairang, Fredrick Edgar Warjri, Joanna Nongbri, bad Ibaiamonlang Brigettte Marngar. Ki barikor na Santiniketan ki long u Amit Kumar Dhara, Jaya Boro, Ketaki Roy Choudhury, Manoj Kumar Prajapati, Tamina Bhattacharya, Archana Das, Mati Lal Kalai, Prabir Biswas, Riya Guha Roy, Bisewajit Das, Koeli Mukherji Ghosh, Krishna Kali David, Srabani Bhattacharya, Anand Ghose, Saday Alo Choudhury, Asit Bose, Nandadular Mukherjee, Sisir Sahana, Sunanda Sanyal, bad ka Rita Ghose.
Kane ka long ka sien kaba nyngkong ba ka kynhun na jylla Meghalaya ka la ïoh bynta ban ïatreilang ha Santiniketan ha kaba ka Riti Academy of Visual Arts ryngkat ka Santiniketan Kala Bhavan Praktony ki la ïatreilang ban pynlong ïa kane ka lympung thohdur ha Santiniketan.
Baroh ki barikor na jylla Meghalaya bad na Santiniketan ki la ïa trei shitrhem baroh shi sngi manla ka sngi bad ha ka por janmiet pat la pynlong ka rwai ka siaw ka put ka tem da ki dhulia bad kaitor na Santiniketan kynthup ruh ïa kaba pyninam ryngkat ka jingbatai shaphang ki durthoh jong iwei-pa-iwei na ki barikor. Hynrei kaba kham kynsai tam ka dei kaba pyninam bad kren bniah halor ka jingim bad jingtrei jong u Ramkinker Baij ba la batai sani da u Dr Janak Jhankar Narzari, President ka Santiniketan Kala Bhavan Praktoni.
Ka jingkren ba la neh palat shikynta la ïathuh bniah shaphang u Ramkinker Baij u ba la wan khmih ïa ka nongbah Shillong ha u snem 1949, ha kaba u la thohdur shibun tylli ki durthoh ba kynsai. Nangta la kren ruh shaphang ka jingim bad jingtrei jong u Ramkinker Baij ba la batai tiak-pa-tiak da u Dr Narzari. Lait na kiwei kiwei ki jingrwai bad jingput jingtem na Santiniketan la rwai ‘phawer’ shaphang ka thohdur da ki barikor ba shimbynta kaba la thaw da u nongïalam Bah Raphael Warjri, kaba la pynshongshit ïa baroh ki paidbah ba la ïadon lang.
