Mumbai, Jylliew:
U heh nongïalam jong ka seng Nationalist Congress Party (NCP) u Sharad Pawar ha ka sngi Palei u la leit ban ïakynduh ïa u Myntri Rangbah jong ka Maharashtra u Eknath Shinde ha ka jaka sah jong u ha Varsha bad wer ïa u ban don bynta lang ha ka prokram ka ban long ha ka 24 tarik, Jylliew kum ka jingrakhe ïa ka jingdap 75 snem jong ka seng ka Maratha Mandir, ha kaba u Pawar u la long u President.
Ha ka miet jong ka sngi Palei, u Gautam Adani u heh spah uba dei khmih halor ki karkhana u la leit jngoh sha ïingsah jong u heh nongïalam jong ka seng NCP, ha kaba la bna khubor ba u lah ban rung ha ki kam saiñ pyrthei.
Ka jingïalang kaba nongkong eh hapdeng u Pawar bad u Shinde ka la long hadien ba u Shinde u la dep ban shimti ïa ka kam kum u Myntri Rangbah, ha kaba kane ka jingïalang ka la kut hadien shiteng kynta.
Hadien ka jingïalang, u Pawar u la phah jingthoh lyngba ka Twitter ha kaba u la khot la wer ïa u Shinde sha ka prokram jong ka seng ban rakhe ïa ka jingdap 75 snem jong ka seng Maratha Mandir, ka shlem ai jingïarap ïa kaba la seng ha u snem 1945 da u GG Gawde uba la khlad noh, ïa uba la tip paidbah da baroh kum u Babasaheb Gawde, uba la pynsngew ba la donkam ban buh da ka jaka ai jinghikai ban pynsngewthuh sha ki briew khnang ba kin tip ïala kijong ki hok.
Kumba la pule bniah na ka ‘website’ jong ka, la ong ba ki nongseng ki la buh kyrteng ïa kane ka jaka ai jinghikai da ka Maratha Mandir – Maratha kaba mut na ka bynta kito baroh kiba ñiew ïa ka Maharshtra kum ka ïing jong ki bad Mandir ban ñiew ïa ka jingkhuid jong ka jingim briew.
Ha ka jingphah jingthoh jong u lyngba ka Twitter, u Pawar u la bynrap shuh shuh da kaba ong ba u la ïakren ruh ha kaba ïadei bad ki jingeh ba la ïakynduh da ki khlur ak phlim bad ki riewshemphang ha ki phlim Marathi bad ki karkhana shna phlim bad buh ka jingkyrpad ïa u Shinde na ka bynta ban buh da ka jingïalang khnang ban lah ban pynpaw ïa ki jingeh jong ki.
U Shinde, ha kaba ïadei bad kane, u la ong ba ka jingïakynduh jong u bad u Pawar ka long shi bynta kum ka jingïakynduh ha ka ban ïa ai khublei khublei bad ïakitbok markylliang.
