New Delhi, Jylliew:
Hadien ka jingphla jong u Dinesh Gope, uba long u nongïalam jong ka seng People’s Liberation Front of India (PLFI) ha ka por ba ka la don ka jingtohkit, ka kynhun National Investigation Agency, ha ryngkat ka jingïatreilang bad ki pulit jong ka Jharkhand Police, ki la ïohlad ban kurup biang ïa kiba bun ki tiar pynbthei, ki tiar siat bad ki kuli ïasiat na ki lai tylli ki distrik jong ka Jharkhand.
Ka jingïohlum jingtip na u nongïalam jong ka kynhun PLFI kaba long ka kynhun jong ki lehnoh Naxal, uba dang don mynta ha kti jong ka kynhun NIA na ka bynta ka jingshah tohkit ha ki phra sngi naduh ba u la shah kem ha ka 21 tarik, Jymmang, ka la ïarap ïa ki kynhun wadbniah ba kin pynlong ïa ka jingleit khynra sha Jhariatoli, Garai, kiba hap hapoh ka jingkhmih jong ki pulit ka Rania kaba don ha Khunti distrit ha ka lah sngi u Blei ha kaba la ïoh ban kurup ïa 62.3 kilo u Gelatin bad kumba 732 song ki kuli ïasiat jong ka 5.56 mm.
Ha kane kajuh ka sngi, kawei ka pistol, 11 song ki kuli ba 5.56 mm bad kumba 30 song ki kuli jong ka suloi 303 la ïoh ban kurup na ka shnong Kisni kaba don ha ka thaiñ Kamdara jong ka Gumla distrik.
Kham hadien, ha ka sngi ba-ar ruh, ar tylli ki bom IED la ïoh ban kurup na ki khlaw ba long lum jong ka Mahuatoli, kaba hap hapoh ka jingkhmih jong ki pulit ka Mahabuang kaba don ha Simdega distrik da ka kynhun NIA bad ka kynhun pulit jong ka jylla.
Ha ka taïew ba la lah ha ka sngi Thohdieng ka kynhun NIA ha ryngkat ki pulit jong ka Jharkhand ki la ïoh ban kurup ïa shibun ki tiar ïasiat na kawei ka khlaw kaba rben kaba don ha ka thaiñ Kamdara jong ka Gumla distrik kaba don ha Jharkhand ha kaba ïadei bad ka jingpynlong ïa ka jingleit khynra na ka jingpynlong ïa ka jingtohkit ha kaba ïadei bad ka jingdon jong ka jingthong pisa jong ka seng PLFI halor ki kam pyntriem.
Kumba la ïathuh ka tyllong khubor kaba la wan na ka kynhun NIA la ong ba ka jingïoh kurup ka kynthup ïa 1245 song ki kuli ba 7.62 MM bad 271 song ba 5.56 MM. Ïa kine ki tiar siat ba la ïoh ban kurup ha Siksohara, Nalanda (Bihar) ha ki ar snem ba la leit.
