Srinagar, Jylliew:
Ki pulit ha Jammu & Kashmir ha ka sngi Palei ki la ong ba ki la lah ban pynpulom ïa ka jingthmu pyntreikam jong ka kynhun khaïi drok ha ka jylla bad arngut ki dkhot jong ka kynhun ki la shahkem ha ryngkat 22 kilo u jingdih pynbuaid uba la kot sha ka T. 150 klur ha ka ïew bar ri.
Katkum ka jingïathuh jong ka tyllong khubor kumba la kren da ki heh pulit, la ong ba arngut ki dkhot jong ka kynhun runar kiba dei ki nong Punjab ki la shahkem noh hajan ITI Sunderbani ha ka sngi Balang.
“Ka kynhun wad bnaih ka la ïoh jingtip shaphang ka jingïaid lynti jong kine ki arngut kiba la wan na Rajouri ban poi sha Jammu ha ka kali ha ka sngi Balang janmiet,” la ong u Senior Superintendent of Police jong ka Rajouri u Amritpal Singh ha ka jingïakren bad ki nongthoh khubor.
“Kum shi bynta ban pynsted ïa ka jingpyntreikam ha kaba ïadei bad ka khubor ba la ïohpdiang, ki kynhun pulit ki la long adkar na ka bynta ban pynlong ka jingkhmih bniah ha baroh ki bynta jong ka distrik bad buh ruh ïa ki Checkpost na ka bynta ban ïohkem ïa ki,” la ong u Singh.
Ïa katei ka kali jong kitei ki briew la ïoh ban bat da ki pulit ha ka Checkpost jong ki kaba don hajan ITI Sunderbani ha ka surok bah Jammu-Rajouri. Ha ka por ba la pynlong ïa ka jingkhmih bniah na ki bad ïa ka kali jong ki, ki kynhun pulit ki la lap ïa u Heroin ba 22 kilo, la ong u SSP. Ïa kine kiba la shahkem la tip kyrteng kum u Onkar Singh bad u Shamsher Singh, kine baroh arngut ki dei ki nongshong shnong jong ka Gurdaspur distrik kaba don ha Punjab, la ïathuh ki pulit.
Ka la don ka jingbuh jingujor pyrshah ïa kine baroh arngut bad ka jingtohkit ha kaba ïadei bad ka jingjia ka dang ïai bteng, la bynrap ki pulit. “La khmih lynti ba nangne shakhmat yn sa nang ïohkem shuh shuh ïa kiwei pat hadien ka jingtohkit,” la ong u SSP, ha kaba u la bynrap shuh shuh da kaba ong ba kane ka jingkem ïa kine ki runar mynta ka long ka jingjop kaba khraw ha kaba ïadei bad ka jingpynpulom ïa ka jingpyntreikam jong ki halor ki jingdih pynbuaid. Ki heh pulit ha Jammu & Kashmir ha ka sngi Palei ki la ong ba ki la don kumba 217 ngut ki nongkhaïi druk kiba la shahkem bad ki jingdih pynbuaid kiba la kot sha ka palat T. 7 klur la ïoh ban kurup haduh mynta.
Ka tyllong khubor ka la ïathuh shuh shuh ba ki pulit ki la ong ba kum shi bynta ban pynpulom ïa ka jingpyntreikam ha kaba ïadei bad ka jingkhaïi drok, ki pulit jong ka Baramulla ki la buh jingujor halor 144 tylli ki jingjia kiba la shah pynngat halor ka Narcotic Drugs and Psychotropic Substances (NDPS) Act ha ki san bnai jong une u snem.
