New Delhi, Jylliew:
Uwei u lehnoh u la shah pynïap ha ka jingïasiat kaba markylliang ba la mih hapdeng ki shipai ïada ri bad ki lehnoh ha ka por ba ka la don ka jingleit kerkut bad ka jingleit thwet lehnoh ha Rajouri distrik kaba don ha Jammu & Kashmir.
Ka jingïasiat hapdeng kine ki ar kynhun ka la sangeh mynta hynrei ka jingleit thwet lehnoh ka dang ïai bteng.
Ka jingïasiat ka la mih ha ka thaiñ jong ka shnong Dassal Mehari ha Rajouri, la ïathuh ki heh shipai.
Hadien ba la ïoh jingtip shaphang ka jingdon jong ki lehnoh, ka kynhun shipai ïada ri ka la pynlong ïa ka jingleit kerkut bad ka jingleit thwet lehnoh ha ki bynta ba long khlaw jong ka Rajouri distrik ha J&K.
Ki shipai ki la ïakynduh bad ki lehnoh bad nangne ka la sdang ka jingïasiat ha ka por shiteng miet.
“Ha ka por ba la pynlong ïa ka jingleit thwet lehnoh da ki shipai ka tnat Indian Army ha ka jingïatreilang bad ka kynhun JKP, ka kynhun wad bniah ka la ïohi ba don ba ïaid ha ki bynta ba long khlaw jong ka Dassal Gujran kaba don hajan Rajouri ha ka miet shiteng synñia jong ka 1 tarik bad 2 tarik jong u Jylliew 2023. Haba ki la shah pynibor ha ki shipai jong ngi, ki la siat bad na ka liang ka kynhun shipai ka la pynphai kylla ïa ka jingsiat. Ka jingïasiat kaba markylliang ka la bteng baroh shimiet,” la ong ka jingthoh kaba la wan na ka tnat shipai.
“Ïa ka jingleit thwet lehnoh la pynlong ha ka jingïatreilang jong ka kynhun shipai ka tnat Indian Army bad ka kynhun JKP,” la ong u heh shipai.
Kum shi bynta ban pyntikna halor ka jingjia, u ADGP u Mukesh Singh ha ka jingïakren bad ki nongthoh khubor u la ong ba ka jingïasiat ka dang ïai bteng.
Ha ka sngi Palei, ki shipai ïada ri ki la kem ïa arngut ki lehnoh jong ka kynhun Lashkar-e-Taiba (LeT) ha Baramulla distrik jong ka Jammu & Kashmir bad ïoh ruh ban kurup ïa ki tiar siat na ka jingkhmih bniah, la ïathuh ki pulit.
Ha ka por ba la pynlong ïa ka jingleit thwet ïa kine ki arngut, la ïoh ban kurup ïa ar tylli ki pistol ba la shna ha China, ar tylli ki Magazines bad 15 tylli ki pistol.
Ïa kine kiba la shahkem la shimti noh da ki pulit na ka bynta ban pynlong ïa ka jingtohkit, la ïathuh u nongaiktien. Kine ki arngut kiba la shah kem ki dei kiba la tip kyrteng kum u Suhail Gulzar jong ka Frestihar Kreeri bad u Waseem Ahmad Pata jong ka Hudipora Rafiabad, baroh arngut kine kiba la shahkem ki dei ki ba la ïatreilang bad ki lehnoh ka kynhun LeT, la ïathuh u nongaiktien.
Ka la don ka jingbuh jingmudui pyrshah ïa ki ha kaba la pynngat ha ka kyndon Arms Act bad Unlawful Activities (Prevention) Act bad ka jingtohkit ha kaba ïadei bad kane ka dang ïaid shakhmat, u la ong.
