Ranchi, Jylliew:
Kiba bun na ki jaka tih marpoh khyndew ïa ki bym pyndonkam shuh ki la shah pyndonkam ha ki nongpynïaid distrik kum ki jaka ban ai jingkyrshan bad ki lad kamai na ka bynta ki samla lyngba ka kam ri dohkha ha ka distrik kaba ju shah thombor bha ha ki lehnoh ha West Singhbhum distrik jong ka Jharkhand.
Kane ka jingpyntreikam ka la ïarap ïa ki samla ba kin lah ban ïeng hala kijong ki kjat bad ban kham pynduna ïa ka jingleit trei jong ki sha kiwei pat ki jylla.
Kumba la ïathuh ki bor ba dei khmih, la ong ba kane ka jingpyntreikam ym tang ba ka ïarap ha ki lad kamai ne ban pynduna ïa ka jingleit trei jong ki briew shabar jylla hynrei ka ïarap ban wanrah ka jingïadei ha kaba ïadei bad ka jingweng ïa ki jingeh ba ïakynduh na ka jingduna ki jingbam batei ha ka thaiñ.
Ïa kane ka skhim la wanrah ha ka por ba don ka jingwan lynshop jong ka khlam Covid naba ki la don bun ki briew kiba la wan trei nabar jylla ki la wanphai ha kaba ki la shu shong ïing naba kim don jingtrei, ki la ong.
“La thaw ïa ka kynhun jong ki briew kiba khlem kam bad la sdang ban buh ïa ki jaka ri dohkha na ka bynta ban ai jingïarap bad jingmyntoi ïa ki ba bun ha kane ka thaiñ. Shuh shuh, la ong ba ïa ka jingpyntreikam ïa ki lieng la wanrah ha kane ka thaiñ lyngba ka jingdon jong kine ki par bym pyndonkam shuh khnang ban long ki lad kamai na ka bynta ki nongshong shnong ka thaiñ,” la ong u District Fishery Officer u Jayant Ranjan.
Ki la ïoh ruh ïa ki dohkha khnang ban nang pynbun shuh shuh ïa ki jingbam batei na ka bynta jong ki khnang ban weng ïa ki jingeh kiba mih na ka jingkyrduh ïa ki jingbam batei, u la bynrap.
U Ranjan u la ong ba ïa mynta, ïa kane la leh ha ki ar tylli ki par bad ka jingpyntreikam ka dang ïaid shakhmat na ka bynta ban nang pynïar shuh shuh ïa ka jingpyntreikam ha baroh kawei ka distrik naba ka West Singhbhum ka la don ïa shibun ki par tih marpoh khyndew ïa kiba ym shym la pyndonkam shuh, u la bynrap shuh shuh.
Ki nongshong shnong ki la shah bthah ba ki la dei ban thaw ïa ka kynhun khnang ba kin lah ban sdang ïa kane ka kam ha ki thaiñ jong ki ruh, u la bynrap.
Ki ar tylli ki par tih marpoh khyndew ïa kiba la sdang ban pyntreikam ki dei ki par mawshun kiba don ha Kamarhatu kaba ha Sadar Block bad ka Karanjia kaba don ha Jagannathpur Block, ha kaba kane ka don ha ka jaka kaba heh da 8-10 akar.
“Ïa kane ka skim la sdang shi snem shwa naba kiba bun ki briew kiba trei sha bar kiba la wanphai ïing na kiwei pat ki distrik ki la shu shong ïing. Kane ka skhim ka la ïarap ha ka ban khmih bniah ïa kine ki nongtrei bar jylla naba kine ki briew ki la hap shu shong ïing,” la ong u Ranjan.
Kaba sngewtynnad ka long ba kine ki nongïoh myntoi ki dei ki trai jaka ha kaba ïa ka khyndew jong ki la pyndonkam da bun snem na ka bynta ban pyntih ïa ki marpoh khyndew ha kaba ki la hap ban shu iehnoh ïa ki.
“Kawei kawei ka kynhun ka don ïa kumba 50 ngut ki briew ha kaba ki la pynrung kyrteng bad ka Cooperative Society. Kawei kawei ka par ka bym pyndonkam shuh ka ngiam ïa kumba 25 tylli ki jaka ri dohkha bad 2-3 tonne ki dohkha ha kaba ïa kine la lah ban pynmih na kawei kawei ka jaka,” la ong uwei na ki nongïoh myntoi u Arjun Mahapatra.
Ïa baroh ki jingkyrshan la pynbiang da ki bor pynïaid distrik na ka bynta ka jingri dohkha ha kaba ki lah ban kamai lajan 1.5 lak ha ka shi snem, u la bynrap.
