Chandigarh, Jylliew:
Hadien ba la ithuh ba ka la don ka jingap jingma bad ka jingbym buh jingshngaiñ hadien ba la don lai tylli ki jingjia jong ka jingpynbthei bom ha ka thaiñ ba marjan bad ka Golden Temple, la buh bad pyntreikam ïa kumba 50 tylli ki CCTV ha ki bynta ba sawdong jong ka Complex bad ka Heritage Street da ka kynhun Shiromani Gurdwara Parbandhak Committee (SGPC).
Kane ka kynhun ka la rai ban buh ïa ki Scanner ha baroh ki jaka rung khnang ban lah ban ai ka jingshngaiñ na ka bynta ki riewngeit kiba ju leit duwai ha ka Golden Temple bad kumjuh ki nongleit jngohkai.
Ha ka sien kaba nyngkong la pyntreikam ïa ka kynhun jong ki pulit kynthei na ka bynta ban khmih bniah ïa ki kynthei kiba rung bad ha kitei ki jaka.
Shuh shuh nalor kane, la ïathuh ba la buh ruh ïa ka LED Screen kaba heh ka ban lah ban pyni bad pynpaw lut, nalor ki jaka bad ki bynta ba kongsan jong ka jaka kyntang ki ban paw ha ka Complex.
“Ïa kine ki sienjam la shim hadien ba la jia ki jingbthei bom ha sawdong ki bynta jong ka Golden Temple,” la ong u heh jong ka SGPC.
Mynta ha baroh ki jaka rung jong ka Temple, ka kynhun SGPC ka la khmih bniah ïa ki riewngeit kiba rung ha katei ka jaka ha kaba ki la dei ban bud katkum ki kyndon ba la buh ne bthah ïa ki.
Ka la don ruh ka jingkhmih bniah ïa ki pla ba ju rah hapoh kane ka jaka, la ïathuh ka tyllong khubor.
Kumba la ïathuh ka tyllong khubor, la ong ba ha ka jingïalang jong ki nongkitkam, ka kynhun SGPC ka la rai ban buh ïa ka Scanner ka ban batai bniah shaphang ki tiar kiba don ha ka met jong u briew bad ha ki jingrah jingrong haman ki jaka rung jong ka Golden Temple.
Ha kaba ïadei bad kane, ki la pyntikna ba ki riewngeit kiba rung ha kane ka jaka kin ym shah pyndik ne pynthut.
Ka tyllong khubor ka la ïathuh ruh ba ki kynhun wadbniah ki la ïatreilang bad ki pulit na ka bynta ban wanrah jingshngaiñ ha kane ka jaka. Ka jingbthei bom ha ka sien kaba nyngkong kaba la jia hajan ka Golden Temple ka la jia ha ka 6 tarik, Jymmang, kaba ar ka la jia ha ka 8 tarik, Jymmang.
Ka jingjia ha ka sien kaba lai ka la jia ha ka 11 tarik, Jymmang. Ki la don kumba san ngut ki briew kiba la shah kem hadien kine ki jingjia, ha kaba ki pulit ki la lap ïa ka jingshisha bad lah ban khanglad na kum kine ki jingjia.
Hashwa ban pynlong ïa ka Operation Bluestar Anniversary Week ïa kaba la tip ruh kum ka Ghallughara Week, ki pulit jong ka Punjab ki la pynkhlaiñ ïa ka kynhun ïada ha baroh ki bynta jong ka jylla khnang ban pyntikna ba kane ka jingrakhe kan ïaid beit ïaid ryntih.
U Special DGP Law and Order u Arpit Shukla u la ong ba ki la don kumba 110 tylli ki jingïaid pahara ha ki surok ba la pynlong ha ka sngi Thohdieng ha kaba kane ka la long sha ki 192 tylli ki jaka kiba kham ap jingma kiba don ha baroh 28 tylli ki distrik.
Ka kynhun ki Sikh ka Dal Khalsa ka la pynbna na ka bynta ka jingkhot pakhang ha Amritsar ha ka 6 tarik, Jylliew kum shi bynta ban rakhe ïa ka jingdap 39 snem ka Operation Bluestar da kaba buh ïa kiba bun ki lama ha kylleng ka nongbah.
Ki nongkitkam jong ka kynhun ki la shah bthah ba ki la dei ban ai jingkyrshan lem ha kaba ïadei bad kane ka jingkhot pakhang ha ka nongbah.
Ha u Jymmang jong une u snem ki la jia ar tylli ki jingpynbthei ïa ki bom kiba kham tlot bor kiba la jia hapoh ki 30 kynta hajan ka Golden Temple.
Baroh ar tylli kine ki jingjia jong ka jingbthei bom ki la pynmynsaw ïa uwei u briew ha kawei ka jingjia katba ïa uwei pat ha kawei pat ka jingjia ba la jia ha Heritage street ka lynti ïaid kjat kaba don 800-metre na ka Town Hall sha Darbar Sahib.
