Bengaluru, Jylliew:
U CEO jong kawei ka kompeni ha Bengaluru u la shahkem hadien ka jingshah pynshisha ba u la thok la shukor ïa ki 2000 ngut ki khynnah pule haduh T. 18 klur, la ïathuh ki lad phah khubor.
Kumba la ïathuh ka kaiphot jong ka Moneycontrol, la ong ba ka kompeni ka la shu kular kai sha kine ki khynnah halor ka jingpynbiang ïa ka ram bad kiwei pat ki jingkyrshan pisa na ka bynta ki jingpule jong ki. Kumba la ïathuh ki heh ka kynhun wadbniah, la ong ba man uwei ne kawei, ka ne u khynnah pule ki la ai mar T. 2 lak ha kaba ïadei bad kane.
U CEO jong ka “Geeklurn,” ïa uba la pynithuh ïalade kum u Sreenivas, u la shah rah ha ki pulit na ka bynta ka jingtohkit.
Ha kaba ïadei bad kane, ki dkhot ba hakhmat eh jong ka kompeni ki kynthup ïa u Chief Financial Officer u Raman P C bad u Operations Head u Aman, kine haduh ba la thoh ïa ka khubor kim pat shahkem.
Kane ka jingjia ka la paw pyrthei haba uwei napdeng ki khynnah pule uba la 26 snem, uba la pynrung kyrteng ïalade ha ka Data Science Course kaba 24 bnai hapoh jong ka kompani ha u Nohprah, u la buh da ka jingmudui pyrshah ïa u CEO bad kiwei pat ki dkhot nongkitkam, ha kaba u la kynnoh ïa ki ba ki la leh thok ïa u.
Katkum ka jingmudui, ka la mynjur ban siew noh ïa ka EMI (Equated Monthly Installment) jong ki khynnah pule haduh ba kin da ïohkam, ha kaba ïa kiba dei ban ïoh yn sa ai sha ki khynnah, la ong ka tyllong khubor.
Kumba la pynshisha la ong ba kine kiba la shah kynnoh kim shym la lah ban pynurlong katkum ki jingkular jong ki.
Ki la sangeh noh ban ai ïa ka EMI sha ki Account jong ki khynnah pule naduh ki lai bnai ba la leit bad pynshisha ba ka jingïasoi ka la kut bad la weng noh khlem da tip bniah ïa ki daw halor jong ka, ha kaba la dawa ba la dei ban siew ïa ki jingsiew ba dang sah.
Kumba la ïathuh u heh pulit, la ong ba u khynnah pule uba la phah ïa ka jingmudui um pat ïoh ïa ka bhah ba u dei ban ïoh naba bun ki dei ki bym pat pyndep ïa ka Online Course bad ba kim pat ïoh kam, la ïathuh ka kaiphot.
Hadien ka jingphah jingmudui kaba nyngkong, ki la don shuh shuh sa kumba 13 ngut ki khynnah pule kiba la mih shakhmat na ka bynta ban ïathuh ba ki la shah thok ha ka “Geeklurn.”
U heh pulit u P Krishnakanth u la ong ba ki kam thok jong ka “Geeklurn” kim pat ju paw ha Bengaluru baroh shi katta, hynrei ki la jia teng ha kiwei pat ki jylla kum ha Maharashtra bad Andhra Pradesh.
