Shah ñiew 15 tylli ki ïing kum ki bym don jingshngaiñ shuh ban sah

Mumbai, Jylliew:

Ka Mumbai Building Repairs and Reconstruction Board (MBRRB) of Maharashtra Housing and Area Development Authority (MHADA) ka la ithuh ïa kumba 15 tylli ki ïing ïa kiba la shah khang ba kim long shuh kiba bit na ka bynta ban shong ban sah hapoh jong ki bad la rai ba ki la long ki bym shngaiñ bad buh jingma.

Kine ki ïing baroh ki don ha South Mumbai. Ha kine ki 15 tylli ki ïing, ki la don kumba 424 tylli ki longïing kiba shong hapoh jong ki bad 21 tylli ki dei ki jaka die jaka thied.

Hadien ba ka la don ka hukum ba la phah da ka Board halor ka jingphah mih noh ïa ki briew kiba shong ha kine ki 15 tylli ki ïing, 155 tylli ki longïing ki la pynkhreh dalade bad kynriah noh sha kiwei pat ki jaka, katba 21 tylli ki la shah pynkynriah sha ki jaka sah ba la pynbiang da ka Board.

Na ka bynta kiba dang sah, ka MBRRB ka la pynkhreh na ka bynta ban pynmih bad ai jaka sah ïa ki, la ïathuh ki heh ba dei khmih.

Ha kaba ïadei bad kane ka MBRRB jong ka MHADA ka la kyntu ïa ki nongshong bad ïa ki trai jong ki jaka die jaka thied ba ki la dei ban mih noh na kine ki ïing ki bym buh jingshngaiñ shuh na ka bynta jong ki ba kin shong kin sah hashwa ban bteng ka jinghap slap khnang ban lait na kino kino ki jingjia basngewsih. Shuh shuh la ïathuh ba ka MHADA ka la pynmih ïa ki Helpline Numbers 23536945, 23517423, 9321637699 lada jia ba donkam kyrkieh.

Man u snem, ka MBRRB, hashwa ban wan ka aïom Lyiur, ka ju pynlong ïa ka jingleit jurip bniah ïa ki ïing kiba la rim bad ju buh kyrteng bad jingmaham ïa ki ïing kiba lah tor ne kiba la buh jingma.

Kane ka jinglah jong ka kynhun ba lei khmih bniah ban lap ïa kum kine ki jait ïing kan wanrah jingshngaiñ ïa kiba bun.