Mumbai, Jylliew:
Ka kynhun Central Bureau of Investigation (CBI) ka la kem ïa uwei u dkhot jong kawei ka kompeni ha Mumbai ha kaba ïadei bad ka jingklop ïa ka pisa kaba la kot sha ka T. 280 klur na ka Bank.
Une u briew uba na South Mumbai, u dei uba la tip kyrteng kum u Harresh Mehta jong ka kompeni Rohan Lifespaces Ltd, u la shahkem noh ha ka kynhun Economic Offences Wing (EOW) jong ka kynhun CBI.
Ka kynhun EOW Mumbai Unit jong ka kynhun CBI ka la buh jingmudui halor kane ka jingjia da ka jingmudui ba la ïohpdiang na ka Bank jong ka Thane Branch pyrshah ïa ki Director jong ka RRL kiba kynthup ïa u Vijay Gupta bad u Ajay Gupta.
U Mehta ïa mynta u dang shah set na ka bynta ka jingshah tohkit. Katkum ka jingmudui ejahar jong ka kynhun, ka jingtohkit ka ïadei bad ka jingjia kaba la jia ha u snem 2016 hadien ba la ïohpdiang ïa ka jingmudui pyrshah ïa ki Director jong ka kompeni ba la tip kum ka Rajput Retail Ltd (RRL).
Ka jingmudui ka la ong ba ki Director jong ka RRL ki la ïoh jingmyntoi na ka pisa ba la sei na ka SBI (State Bank of India) bad ki la thok ïa ka Bank haduh T. 280 klur.
Ka jingmudui ka la ong ba ka RRL bad ki Director jong ka ki la ïadonktilang bad une uba la shah kynnoh, kynthup ïa ki nongtrei sorkar ki bym lah ban ithuh bad ki la ïoh jingmyntoi na ki 3 tylli ki Loan halor ki bynta bapher bapher na ka Bank.
Une uba la shah kynnoh u la leh thok ïa ki kot donkam bad thok ïa ka pisa kaba haduh T. 280 klur. Ha u Naitung jong u snem 2018, ka kynhun CBI ka la buh jingmudui ha kaba ïadei bad ka jingjia.
Na ka jingpynlong ïa ka jingtohkit, la ïoh jingtip halor ka jingdonkti jong u Harresh Mehta jong ka kompeni Rohan Lifespaces Ltd, bad ka Rohan Constructions Ltd.
Ki la don ki jingleit khynra ha ki jaka treikam bad ki jaka sah jong u Mehta bad ka Ruby Mills Ltd da ka kynhun kaba la pynlong ïa ka jingtohkit. Na ka jingpynlong ïa ka jingtohkit, la lap ba ïa ka Loan la mang na ka bynta ban thied ïa ka jaka kaba don lai mala ka ïing, ka The Ruby, ha ka dor kaba T. 149 klur bad kawei pat ka Short-Term Loan kaba T. 16 klur sha ka RRL ha u Naiwieng jong u snem 2011. Ka Loan baroh kaba T. 155 klur ka dei kaba la pdiang da ka Ruby Mills Ltd ha u Rymphang jong u snem 2012.
