Patna, Jylliew:
U nongïalam jong ka seng JD(U) bad u Myntri Rangbah jong ka Bihar u Nitish Kumar ki la shim ïa ka lad na ka bynta ban ai jingkren ha ka por ba la don ka jingïalang bad ki heh nongïalam jong kiba bun ki seng nalor ki nongïalam jong ka seng Congress, Aam Aadmi Party, bad ka kynhun Left kum shi bynta ban wanrah ïa ka jingïatylli jong ki seng ka liang pyrshah na ka bynta ban ïakhun pyrshah ïa ka seng BJP ha ka ilekshon Lok Sabha 2024. Ka jingïakynduh lang jong baroh ki seng ka liang pyrshah, ïa kaba la thmu ban pynlong ha Patna ha ka 12 tarik, Jylliew, la pynkynriah noh, la ïathuh ka tyllong khubor ha ka sngi U Blei.
Naba u nongïalam jong ka seng Congress u Rahul Gandhi bad ki katto katne ngut ki nongïalam kiba hakhmat eh kim lap ban don bynta ha ka jingïalang ha ka tarik ba la buh, ka la don ka rai na ka bynta ban pynkylla tarik noh ïa ka kham shadien, khnang ba baroh kin ïalait lut ban ïadon bynta ha ka jingïalang.
Kumba la ïathuh ka tyllong khubor, la ong ba u Presidnet jong ka seng Congress u Mallikarjun Kharge bad u nongïalam jong ka seng DMK bad u Myntri Rangbah jong ka Tamil Nadu u MK Stalin ki la pynpaw ba ki shem jingeh ban ïadon bynta ha ka jingïalang kumba la pynbeit ba kan long ha ka 12 tarik, Jylliew na ki daw bym lah kiar.
U Gandhi ïa mynta u don ha US. U Myntri Rangbah jong ka Bihar u Nitish Kumar bad u Myntri Rangbah jong ka Delhi u Arvind Kejriwal hashwa ki la pynpaw ba ki la kwah ban wanrah ïa ka jingïatylli jong ka liang pyrshah na ka bynta ban ïakhun ïa ka seng BJP ha kaba u nongïalam jong ka seng JD(U) u la ïakynduh ïa u nongïalam jong ka seng AAP ha ka jaka sah jong u bad ki la rai ban nang bteng shuh shuh ha ka jingai jingkyrshan ïa u ha kaba ïadei bad ka jingthmu ban ïakhun pyrshah ïa ka sorkar kmie naba ka la la leh donbor ha ka synshar ka khadar.
Dang shen, u nongïalam jong ka seng Congress u Rahul Gandhi ha ka jingai jingkren jong u ha Washington u la ong ba ka seng BJP kan sa shah kyndang noh ha ki jingïakhun ïa ka ilekshon Assembly ha ki lai ne saw snem ban wan ha ka seng Congress, ha kaba ka la paw ba ki seng ka liang pyrshah ki donkam ban pynrem noh ïa kane ka sorkar kaba bat ïa ka jingsynshar naba kam ju ai ka jingkyrshan na ka bynta uba bun balang ha ka ri.
Kaba sngewtynnad ka long ba kiba bun na ki seng ka liang pyrshah ki la don kajuh ka jingmut ha kaba ki la ai ka jingkyrshan halor ka jingthmu ban ïakhun pyrshah ïa ka seng kaba bat ïa ka jingsynshar.
Kumba la sakhi, la ong ba ka jingïatylli jong ki seng ka liang pyrshah, ka la paw ha ka sngi ba la pynbam smai ïa u nongïalam jong ka seng Congress u Siddaramaiah kum u Myntri Rangbah bad u DK Shivakumar kum u Symbud Myntri Rangbah ha Bengaluru, ha kaba ha kane ka sngi la ïohi ïa u Myntri Rangbah jong ka Tamil Nadu u M K Stalin bad kiba bun kiwei pat ki nongïalam kiba la don bynta ban sakhi lang ïa katei ka sngi ha kaba ki la wan ban ïasnohktilang na ka bynta ban ïatylli bad ïatreilang na ka bynta ka ilekshon Lok Sabha 2024.
Kumba la ïathuh ka kaiphot, la ong ba u Nitish Kumar u la pynlong ïa kum kine ki jingïalang bad ki nongïalam jong ka liang pyrshah ha u bnai ba la lah.
U Kumar bad u Symbud jong u u Tejashwi Yadav ki la ïakynduh ïa u heh nongïalam jong ka seng Shiv Sena (UBT) u Uddhav Thackeray ha ka jaka sah jong u kaba don ha Matoshree, ha Mumbai.
U la ïakynduh ruh ïa u Chairperson jong ka seng Trinamool Congress (TMC) bad ïa ka Myntri Rangbah jong ka West Bengal ka Mamata Banerjee, ïa u President jong ka Samajwadi Party (SP) u Akhilesh Yadav, u Myntri Rangbah ka Odisha u Naveen Patnaik, ha ryngkat ka jingïakren bad ïamir jingmut bad u heh nongïalam jong ka seng NCP u Sharad Pawar.
