Chennai, Jylliew:
Ka rel kaba kyrpang kaba la kit ïa palat 100 ngut ki briew kiba la lait im na ka jingjia ïatakhuh jong ki rel kaba shyrkhei kaba la jia ha Odisha ki la wan poi ha ka jaka sangeh rel jong ka Chennai ha ka por 4.30 baje jong ka step sngi U Blei, la ïathuh ki heh ba dei khmih. “Baroh ki nongleit jingleit kiba la poi ki dei kiba la lait im na ka jingjia. Ki la don kumba 7 ngut napdeng jong ki kiba la shu mynsaw malu-mala,” la ong u Myntri ka tnat ka koit ka khiah jong ka Tamil Nadu u M Subramanian.
La pynkhreh ïa ki kynhun ai jingsumar bad ki kali kit nongpang ha ka jaka sangeh rel, bad baroh 137 ngut ki nongleit jingleit ki la shah khmih bniah, la ïathuh u heh ba dei khmih. Ki la don kumba 13 ngut ïa kiba la shah phah sha Rajiv Gandhi Government Hospital na ka bynta ka jingshah sumar, hynrei ha ka por shiteng sngi ki la shah pyllait noh lait noh uwei u nongñiah trok ïa uba la tip kyrteng kum u Dharani, la bynrap u heh ba dei khmih.
U Dharani u la wanphai da ka rel Coromandel Express ka ban leit sha Chennai hadien ba u la dep ban leit buh ïa ka trok ha Bangladesh.”Ki la don shibun ngut ki briew kiba la duhnoh ïa ki kti bad ki kjat jong ki,” la ong u Dharani. Une u la don ha ka S1 Coach ha kaba kane ka la julor bha. Uwei napdeng kiba la lait im ha ka jingjia, ïa uba la tip kyrteng kum u Pranav Vignesh, u la ong ba u la pyrta da ka sur kaba jam ban ai dak hashwa katei ka jingjia. “Nga la ïohsngew ïa ka jingwan ïaid jong kawei pat ka rel na katei ka lynti rel. Nga la sheptieng bha,” la ong u Vignesh uba dei u khynnah pule. “Ngam shym mynsaw ei ei, hynrei nga la hap ban pynpait ïa ka ïit jong ka jingkhang ïit ka rel ban mih shabar. Ka kamra ha ka rel ba nga shong ka la kylla.”
Ka sorkar Tamil Nadu ka la pyntip ba ki la don baroh 119 ngut ki briew kiba don da ka kyrteng jong ki nong Tamil bad ki jaka sah ha ka jylla kiba la shah pynshisha ba ki la lait im, ha kaba ym shym don mano mano ruh ki ban ïap na ka jingjia. “Ym don mano mano ruh na Tamil Nadu ki ban ïap ha ka jingjia,” la ong ka jingthoh ba la phah da ka sorkar jylla.
