Bengaluru, Jylliew:
Ka seng BJP ha Karnataka ka la byrngem ban pynlong da ka jingïakhih lada jia ba ka sorkar Congress ka weng noh ïa ka aiñ ba pyrshah halor ka jingshoh doh masi ha ka jylla. “Ki masi bad ki masi dab ki dei ki paralok jong ki nongrep jong ngi, lada dei ban pynsah ïa ka kam rep kam riang ha ka ri, ïa ki masi bad ki muid bad ki masi dab la dei ban pynneh pynsah. Mynta ka sorkar ka la pyrshang ban weng noh ïa ka aiñ, ngi pyrshah jur halor kane bad lada jia ba weng noh ïa ka, ngin sa pynlong da ka jingïakhi ha baroh kawei ka jylla,” la ong u MLA jong ka seng BJP u N Ravkumar ha ka jingïakren bad ki nongthoh khubor.
U nongïalam jong ka seng BJP u la kren ïa kane hadien ba u Myntri ka Karnataka Animal Husbandry u K Venkatesh u la pynsngew ba la thmu ban weng noh ïa ka aiñ ban khang shohdoh ïa ki masi da kaba ong ba lada ïa ki muid, ki masi dab la lah ban shoh doh balei kam long ïa ki masi.
U la dawa ba la dei ban khmih bniah biang ha kaba ïadei bad ka aiñ ban pyrshah halor ka jingshoh doh ïa ki masi ha kine ki khyndiat sngi ba la leit. Ïa ka Karnataka Prevention of Slaughter and Preservation of Cattle Act la wanrah bad pyntreikam da ka sorkar BJP ha u snem 2021. Ka seng Congress, ka la pyrshah halor kane ka aiñ.
