Bhubaneswar, Jylliew:
U Khurda Road Divisional Railway Manager (DRM) u Rinkesh Ray ha ka lah sngi U Blei u la ong ba nalor ki 278 ngut ki briew kiba la ïap, ki la don kumba 1,100 ngut ki briew kiba la mynsaw ha ka jingjia kaba la jia ha ka 2 tarik, Jylliew.
Kumba ka long mynta, la ong ba ka tnat Railways ka la buh jingkheiñ ba ka jingdon jong ka jingïap ki briew ha Odisha na ka jingïatakhuh jong ki rel haduh mynta ka la kiew sha ka 278 ngut, ha kaba ka la ong ba ki la don shuh sa lai ngut ki briew kiba la khlad noh na ka daw ka jingmynsaw jur jong ki.
Hashwa ka la don ka jingbuh jingkheiñ ba ka jingdon jong ki briew kiba la ïap ha ka jingjia ki la don 288, ha kaba na ka liang ka sorkar jylla ka la khmih bniah bad ka la pynbna ba ka jingïap jong ki briew na ka jingjia ka la long 275 ngut haduh ka sngi U Blei, naba ïa ka jingdon jong ki briew kiba la ïap ha ka jingjia la ñiew biang arsien.
Ka jingñiew biang ïa ka jingdon jong ki briew kiba la ïap ha ka jingjia, ka la sah khlem kylla haduh katei ka sngi, ha kaba ha ka sngi kaba bud, kata ha ka lah sngi U Blei da ka jingkhlad noh sa lai ngut ka la kiew sha ka 278 ngut.
Na ka liang ka Myntri Rangbah jong ka West Bengal ka Mamata Banerjee, kaba long ruh ka Myntri brim jong ka tnat Railway, ka la ïathuh ba ha kaba ïadei bad ka jingjia, ki la don kumba 61 ngut ki briew na ka jylla jong ka kiba la ïap ha ka jingjia bad 182 ngut kiwei pat ki dei kiba dang jah bad ym pat lap haduh mynta.
U Roy u la ong ba na kine ki 1,100 ngut kiba la mynsaw, hapoh 200 ngut ki dang shah sumar ha kiba bun ki jaka ai jingsumar.
U la ong ba na ki 278 tylli ki metïap, ki la don kumba 177 tylli ïa kiba la wan kam da ki bahaïing katba 101 ki dei ki bym pat don nongleit kam bad ïa kine ki metïap ïa kiba ym pat don ban leit kam la buh ha ki jaka ai jingsumar bapher bapher.
U Roy u la ong ba ka tnat Railways ka la pyntreikam ïa ki briew na kiba bun ki jylla kiba kynthup na Odisha, West Bengal, Jharkhand, Chhattisgarh, Bihar, Telangana, Andhra Pradesh bad Tamil Nadu khnang ban leit wad bad lap ïa kiba bun ngut kiba dang jah hadien ba la jia kane ka jingjia kaba shyrkhei.
