New Delhi, Jylliew:
Ka kynhun Narcotics Control Bureau (NCB) hynnin ka sngi ka la ong ba ka la lah ban kurup ïa u drok uba bun ha kaba u la kot sha ki hajar klur tyngka.
“Ïa u drok ba bun jong u Party Drug LSD la ïoh ban kurup da ka kynhun wad bniah ha kaba ka la lah ban pynpulom halor ka jingthmu pyntreikam jong ki runar bad ïoh ruh ban kem ïa kiba bun ki nongkhaïi tuh,” la ïathuh ka tyllong khubor.
Ka tyllong khubor ka la ïathuh shuh shuh ba ka kynhun NCB kan sa ïai bteng ha ka ban pynlong ïa ka jingtohkit khnang ban tip bniah shuh shuh shaphang u drok ba la ïoh ban kurup.
Hashwa kane, ka la ong ba ha u bnai ba la lah, ha ka jingpyntreikam kaba kyrpang jong ka kynhun shipai duriaw, ka kynhun ka la ïoh ban kurup kumba 2,525 kilo u Methamphetamine uba la kot sha ka T. 25,000 klur na kawei ka jhad ha ki bynta rudnong jong ka Kerala.
Ka kaiphot ka la ïathuh ba u heh jong ka kynhun NCB u la ong ba kane ka dei ka jingïoh kurup drok kaba bun eh jong ka kynhun wad bniah.
“Ka kynhun NCB bad ki shipai duriaw ki la lah ban pynlong ïa ka jingpyntreikam kaba jop ha Indian Ocean. Ka la long kaba bun tam haba la shim jingkheiñ. Ïa une u drok la wanrah na Chabahar Port kaba ha Iran. Ka tynrai ba la sdang ban pynmih ïa u drok ka dei na Pakistan,” la ïathuh shuh shuh ka tyllong khubor.
Ka jingpyntreikam kaba kyrpang ïa ka ba la tip kum ka Operation Samudragupta, ka dei kaba la sdang ha u bnai Rymphang jong u snem 2022 bad palat 4,000 kilo u drok la ïoh ban kurup haduh mynta.
