Bengaluru, Jylliew:
U Myntri Rangbah jong ka Maharashtra u Eknath Shinde bad u Symbud Myntri Rangbah u Devendra Fadnavis ha ka miet jong ka sngi U Blei ki la leit sha New Delhi bad ïakynduh ïa u Myntri ka sorkar kmie uba dei khmih ïa ka tnat ki kam pohïing u Amit Shah ha ka jaka sah jong u kaba don ha Delhi na ka bynta ban ïakren halor kiba bun ki mat kiba ïadei bad ka jylla.
U Shinde, na Pune ka jaka ha kaba u la don na ka bynta ban plie paidbah ïa kiba bun ki Project, u la mih na ka bynta ban leit sha Delhi, katba u Fadnavis u la mih ban leit sha Delhi na Nagpur ha ka janmiet jong ka sngi U Blei.
“Ngi la ïai wan sha Delhi. Ki la don shibun ki mat ba la dei ban ïakren halor ka jylla, la ka long ha ka liang ki project bapher bapher, ki mat ba ïadei bad ka Marathwada Water Grid Project, ka mat ba ïadei bad ka um ha Konkan bad ki jingeh ba la ïakynduh da ki nongrep,” la ong u Shinde.
Kine baroh ar tylli ki seng kim shym la pynpaw shai halor ka mat kaba don sha lyndet jong ka jingïakynduh jong u Shinde bad u Fadnavis bad u heh nongïalam jong ka seng BJP, kane ka jingleit ïakynduh ka la long hashwa ban kynjoh sha ka shi snem ka sorkar ba la lamkhmat da u Shinde bad u Fadnavis ha ka jylla.
Ki la don ki jingsuba ba kane ka jingleit ïakynduh jong kine ki nongïalam ka long ban ïakren halor ka jingthmu ban pynïar ïa ka kynhun Myntri ha ka jylla, kumjuh ka jingdawa jong ka kynhun seng Sena hapoh ka jingïalam jong u Shinde ha kaba ïadei bad ka shuki Myntri ha ka sorkar kmie.
Kine ki arngut ki nongïalam kin sa ïakren ruh halor ka jingïasam ïa ki konstitwensi hapdeng ka kynhun Sen ba la lamkhmat da u Shinde bad ka seng BJP na ka bynta ka jingïakhun ïa ka ilekshon Civic Dody bad ka Lok Sabha.
