Mumbai, Jylliew:
Kiba bun na ki seng jong ki Hindu kiba la pynlong ïa ka jingïakhih ha Kolhapur ha ka sngi Balang ki la dawa ba la dei ban pynshitom da kaba tyngeh pyrshah ïa ki briew kiba la pyrta ïa ka kyrteng jong u Aurangzeb bad u Tipu Sultan, ha kaba ka la pynlong ïa ki pulit ba kin pyndonkam da ka kynhun na ka bynta ban tehlakam ïa ka jingïakhih.
Hadien ka jingleh kam saiñ pyrthei ka la pynlong ïa ki seng kiba bat ïa ka jingsynshar bad ïa ka liang pyrsah ba kin shah kynnoh ba ki la long ka daw ban wanrah ïa ki jingkynad paidbah.
Ka jingïakhih bad ka jingkynad ha ka nongbah ka la sdang ha ka sngi Ba-ar jong ka taïew ba la lah hadien ba ki la don kumba katto katne ngut ki briew kiba la shah pynshisha ba ki la buh ïa ki dur bad ki Audio ha ki lad phah khubor kiba ktah ïa kiwei pat.
Ar sngi shwa ka jingjia, ka la don ka Video jong ki katto katne ngut ki samla kiba la shad lang ba ki Placard jong u Aurangzeb ha kaba kane ka la saphriang kylleng.
Kumba la ïathuh da u Collector jong ka Kolhapur u Rahul Rekhawar, ki kynhun seng jong ka niam Hindu ki la khot da ka jingïakhih ha ka sngi Balang bad ki la dep ban pan jingbit na ka bynta ban pynlong ïa ka jingïaid paidbah.
“Ha ka sngi Ba-ar hi ngi la pynshitom da kaba tyngeh pyrshah ïa ki briew kiba la don bynta ha ka ban pynsaphriang ïa ki dur bad pyrta ïa ki kyrteng jong kitei ki riewkhraw bad ha kane ka sngi, ki nongïakhih ki la mynjur ba kin ym pynlong ïa kino kino ki jingïaïaid paidbah ne ki jingthaw ïa ki jingkulmar ha ka thaiñ. Hynrei ki la don kumna katto katne kynhun ki bym shym la kohnguh hynrei ki la pynlong da ka jingïaid paidbah kaba la long ha kane ka sngi,” u la ong.
U Myntri ka tnat ki kam pohïing u Devendra Fadnavis u la ong ba ka sorkar kan ym pyllait ïa kito kiba la donkti ban wanrah ïa ki jingkulmar ha ki distrik jong ka Maharashtra.
U heh nongïalam jong ka seng Nationalist Congress Party (NCP) u Sharad Pawar u la ong ba ki la don bun ngut ki briew bad ki riewshim kabu kiba la thaw bad wanrah ïa ki jingkulmar ha kiba bun ki jaka jong ka thaiñ.
“Ki briew kiba don ha ka bor ki la ïaleh ban ai mynsiem halor ki mat ba ïadei bad ki niam. Kam da donkam ban pynthohbria ei ei da kaba mih sha ki lynti ki synkien lada don mano mano kiba phah ïa ki khubor thok lyngba ki Mobile. Ka jingwanrah ïa ka shongsuk-shongsaiñ ka dei ka kamram jong ka sorkar, hynrei ki briew ha ryngkat ka jingïatreilang jong ki seng kiba bat ïa ka jingsynshar ki mih sha ki surok ban pynlong ïa ka jingïakhih. Kam dei ka kam tang marwei. Ka la dei ka jingai jingmut kaba na sha lyndet,” la ong u Pawar.
