Patna, Jylliew:
U Symbud Myntri Rangbah jong ka Bihar u Tejashwi Yadav ha ka sngi Palei u la ong ba ka seng BJP, kumba la pynshisha halor ka jingong ba ha kawei ka por, kan sa pynduh ïa ka hok jong ki rit paid na ka bynta ban ïoh thep vote, kan ym ïoh ïa ka jingjop katba u Nitish Kumar bad u Lalu Prasad Yadav ki dang don ha ka jylla.
“Ki briew jong baroh ki jait niam, ki la ai mynsiem ha kaba ïadei bad ka jingkhun na ka bynta ka jinglaitluid jong ka ri. Ka ri ka dei jong ki riewngeit Hindu, Muslim, Sikh, Khristan bad kiwei pat… kane ka ri ka dei jong baroh, kam dei jong u kpa jongno jongno ruh. Ka la don ka khubor kaba hashwa ba la thmu ban knieh noh ïa ka hok ban thep vote jong ki Muslim. Kumno kane ka lah ban long katba ngi dang don hangne? “Ngi don ïa ki jylla bapher bapher, ki niam kiba pher bapher, ki briew kiba pher bapher, ka kolshor kaba pher bapher, ki jingbam kiba pher bapher, ki rukom leh bapher bapher hynrei ngi ïasahlang hajuh. Ka long kaei kaei kaba sngewtynnad bad ka jingsngew sarong jong ka ri naba ki kynhun bapher bapher ki sah bad imlang hajuh,” la ong u Yadav ha ka por ba u la ai jingkren ha ka jingïalang bad ka kynhun Bunkar ha Gyan Bhawan ha Bihar.
“Namar kata lada don ba pyrkhat ba la thmu ban beh noh ïano ïano shabar ka ri ne ban knieh noh ïa ka hok ban ïoh thep vote jong ki, kan ym lah ban long katba dang don u Nitish bad u Lalu hangne,” u la bynrap.
