Kolkata, Jylliew:
Ka seng Trinamool Congress bad ka seng BJP ha West Bengal ki la ïa pynibor para ma ki halor ka jingpynshisha ba ki la kynnoh mar kylliang ba ki la leh bym suitñiew ïa ka Thakurbari Temple; ka jaka kyntang jong ka kynhun Matua, ha kaba baroh ar kata ka seng TMC bad ka BJP ki la pyrshang ban ïatur markhmat.
Na ka liang jong ka seng Trinamool ka la kynnoh ba u shipai pahara ba la buh da u nongïalam jong ka seng BJP bad u Myntri ka sorkar kmie u Shantanu Thakur, u la rung ha katei ka jaka kyntang ha ryngkat ki juti jong u bad khynñiat ïa ki kynthei. Kum ka jingkynnoh ba ka seng BJP ka la ïuh roit bad khlem kheiñ snep ïa ka jingkhuid jong ka jaka kyntang ha Thakurbari ha ka kyrteng jong ki kam saiñ pyrthei, la ong u heh nongïalam jong ka seng TMC bad u National General Secretary u Abhishek Banerjee, ha kaba u la pynrem jur da kaba ong ba ka la long ka jingpynrem naba la leh donbor.
“Nga da pynrem jur ïa u Shantanu jong ka seng BJP uba la leit ban rung hapoh ka Thakurbari Temple ha ryngkat u shipai CISF, uba la leh bym salia ban burom ha katei ka jaka kyntang da kaba phong juti bad ruh uba la jrong kti ïa ki kynthei kiba dei ki riewngeit kiba don ha katei ka jaka. Ki la ïaid lait bad leh bym suitñiew ïa ka jaka kyntang ha Thakurbari ha ka kyrteng ka kam saiñ pyrthei. Ka jingpynrem jur halor kane ka jingleh donbor!” u la ong lyngba ka Twitter.
“Ki kynthei kiba la ïalum ha katei ka jaka mane blei kiba la leit ban duwai ki la mih shakhmat ban mudui ba utei u shipai jong utei u MP ka seng BJP u la rung hapoh ka jaka mane blei ha ryngkat ki juti, ban jrong kti ïa ki kynthei, ban knieh ïa ki jingdeng ksiar jong ki bad ban pyndonkam da ki kyntien kiba khlem akor ha kaba u la leh ïa ki kam ki bym burom ïa ka jaka kyntang bad ka jingbym kheiñ snep ïa ka kynhun Matua,” la ong u nongaiktien jong ka seng TMC u Kunal Ghosh.
