Pune, Jylliew:
Ki pulit jong ka Maharashtra ha ka sngi Saitjaiñ ki la bom lathi ïa ka kynhun jong ki nongïaid riewblei hajan ka jaka ban rung sha Shree Kshetra Temple kaba ha Alandi, ka jaka sor kaba jngai kumba 22 km na ka nongbah Pune, hadien ba ki la ïakajia bad ki pulit pahara, la ïathuh ka tyllong khubor.
Ha ka sngi Saitjaiñ ki la don da ki spah ngut ki Warkaris kiba dei ki nongïaid riewblei jong u Lord Vithoba kiba la leit sha katei ka jaka mane blei na ka bynta ka jinglehniam ha kaba ka la don ka jingïaid riewblei.
Katkum ka jingbit ba la dei ban bud kumba la buh, la ong ba la dei ban rung lyngba ka phalor jong katei ka jaka mane blei tang 75 ngut ki briew shi sien rung. Hynrei kumba la sakhi, la ong ba ki la don haduh 400 ngut ki nongleit ïaid riewblei kiba la pyrshang ban rung lang ha kajuh ka por ha phyllaw jong ka jaka mane blei, ha kaba kane ka la pynlong ïa ki pulit ba kin khang bad pynsangeh ïa ki, la ïathuh ka tyllong khubor.
U Symbud Myntri Rangbah jong ka Maharashtra u Devendra Fadnavis u la kyntait halor ka jingkynnoh ba ka la don ka jingbom lathi pyrshah ïa ki nongleit ïaid riewblei bad ong ba kane ka jingïakynad ka la long kaba malu-mala, la ïathuh shuh shuh ka tyllong khubor.
U Fadnavis u la ong ba sha man kawei pa kawei ka kynhun la dep ban ai ïa ki Pass ba ki la dei ban rung tang 75 ngut hapoh ka jaka mane blei khnang ban lait na ka jingïathyngngian bad ka jingïaïuh para briew kumba la jia teng ha u snem ba la leit ha kane kajuh ka jaka. Kumba la ïathuh u Symbud Myntri Rangbah, la ong ba kine ki nongleit ïaid riewblei ki la pynkheiñ ïa ka jingkieng ba la buh bad ki la don kumba 500 ngut napdeng jong ki kiba la pyrshang ban rung ha kajuh ka por ha ka jaka mane blei. Ka jingleh jong ki pulit, ka la pynlong ïa ka liang pyrshah ha ka jylla ba kan kynthoh jur.
Kum ka jingkynthoh jur ïa ka sorkar Maharashtra halor kane ka jingjia, u MP jong ka Shiv Sena u Sanjay Raut ha ka jingthoh kaba u la phah lyngba ka Twitter u la ong ba ka kynhun Hindutva ba la lamkhmat da ka sorkar jong u Eknath Shinde ka la khyllem”… Ka jingshah ktah jur jong ka sorkar Hindutva ka la paw…ka bor ka la duh noh. Kumno u Aurangzeb un leh pher na kiwei pat? Ki Mughal ki la khie im ha Maharashtra,” la ong ka jingthoh ba la phah da u MP bad u nongïalam jong ka seng Shiv Sena Sanjay Raut. U nongïalam jong ka seng NCP u Chaggan Bhujbal ha ka jingphah khubor jong u lyngba ka Twittwer u la ong,” Ka rukom ha kaba ki pulit ki la leh pyrshah ïa ki Warkari ha Sri Kshetra Alandi ka long kaba la shah pynrem jur. Kane ka jingleh jong ki ka long kum ka jingñiewbeiñ ïa ki Warkaris ha ryngkat ka jingdonlong jong u Dnyaneshwar Maharaj, uwei na ki riewniam uba la don bynta ban plie ïa kane ka jinglehniam jong ka kynhun ki Warkari, ha kaba ka la long ka jingpynrem jur. Hato ka sorkar ka don kano kano ka jingkitkhlieh na ka bynta kane ka jingshah leh jong ka kynhun ki Warkari ne em?”
Ki Warkaris, kiba la don bynta ha ka jingïaid riewblei na Alandi sha Vithal Temple kaba don ha Pandharpur, ki la sdang ïa ka jingïaid riewblei ha ka 11 tarik, Jylliew. Ka jingpynbna jong u Sant Dnyaneshwar Maharaj Palkhi ka la long na Alandi bad u Sant Tukaram Maharaj Palkhi na Dehu ha ka 10 tarik, Jylliew ha kaba kane ka la long ka jingïaid riewblei kaba heh tam. Kumba la thmu, la ong ba ki Warkaris kin sa ïalumlang ha ka jaka kyntang jong ka Pandharpur ha ka sngi ban rakhe ïa ka Ashadhi Ekadashi, ka ban sa long ha ka 29 tarik, Jylliew.
