Patna, Jylliew:
U President jong ka Janata Dal (United) bad u MP u Rajiv Ranjan Singh ba la tip ruh da ka kyrteng kum u Lalan Singh ha ka sngi U Blei u la ong ba ar ngut ki Myntri Rangbah barim jong ka Jammu & Kashmir kiba kynthup ïa u Farooq Abdullah bad ka Mehbooba Mufti kin sa leit ban ïashim bynta ha ka jingïalang jong ki seng ka liang pyrshah ka ban sa long ha ka 23 tarik, Jylliew ha Patna. Ha ka jingïakren bad ki nongthoh khubor hadien ba la dep ban pynlong ïa ka ‘Milan Samaroh’, u Singh u la ong ba kiba bun ki heh jongïalam jong ki 18 tylli ki seng saiñ pyrthei ki la pynshisha ba kin sa poi beit ha ka jingïalang ka ban sa long na ka bynta ban ïakren sani bha ha kaba ïadei bad ka jingthmu ban ïakhun pyrshah ïa ka seng BJP hashwa bad ha ka por ba don ka ilekshon Lok Sabha 2024.
“Halor kane, baroh ki nongïalam jong ki 18 tylli ki seng ka liang pyrshah ki la mynjur ba kin sa leit ban ïashim bynta ha ka jingïalang. U heh nongïalam jong ka National Conference u Farooq Abdullah bad ka Mehbooba Mufti, ha kaba baroh arngut ki dei ki Myntri Rangbah barim jong ka Jammu & Kashmir, ki la mynjur ban don bynta ha ka jingïalang ka ban sa long,” la ong u Lalan.
U la ong shuh shuh ba ki Myntri Rangbah jong ki san tylli ki jylla kiba kynthup jong ka Bihar, Jharkhand, West Bengal, Delhi bad Tamil Nadu ki la dep ban rai ban don bynta ha ka jingïalang ka ban sa pynïaid da u Myntri Rangbah jong ka Bihar u Nitish Kumar. Ha kane ka jingïalang yn sa ïohi ruh ïa ka jingïashim bynta jong u President jong ka seng Congress u Mallikarjun Kharge bad u Rahul Gandhi. Kum ban bynrap ktien, la ong ba ki Myntri Rangbah barim jong ki katto katne tylli ki jylla, kiba kynthup ïa u heh nongïalam jong ka seng Samajwadi Party u Akhilesh Yadav, u heh nongïalam jong ka seng Nationalist Congress Party u Sharad Pawar bad u heh nongïalam jong ka Shiv Sena (UBT) u Uddhav Thackeray kin sa ïadon bynta ha ka jingïalang.
Ki 18 tylli ki seng kiba la dep ban pyntikna ba kin sa ïashim bynta ha ka jingïalang ki kynthup ïa ka seng Congress, RJD, JD(U), TMC, CPI, CPM, CPI-ML, SP, DMK, NCP, National Conference, PDP, AAP, HAM, Indian National Lok Dal, Shiv Sena (UBT) bad JMM. Kane kan sa long ka jingïalang kaba nyngkong jong ki seng ki bym dei jong ka seng BJP ki ban don bynta ha ka ban wanrah ïa ka jingïatreilang bad ka jingïatylli halor ka jingthmu ban kyndang noh ïa ka seng BJP na ka bor synshar kum ka sorkar kmie. U Myntri Rangbah barim jong ka Bihar bad u heh nongïalam jong ka seng RJD u Lalu Prasad u la ïakren bad u President jong ka seng Congress u Mallikarjun Kharge lyngba ka Phone ha ka sngi Saitjaiñ bad u la wer ïa u na ka bynta ban don bynta ha ka jingïalang. U Lalu u la ïalap ha Patna na ka bynta ban nang pynkhlaiñ ïa ka jingpynkhreh ha kaba ïadei bad ka jingthmu ban pynlong ïa ka jingïalang.
Ha ka jingïakren bad ki nongthoh khubor ha ka jingïalang kaba la long ha ka sngi U Blei, u la ong ba ka jingpynkhreh ha kaba ïadei bad ka jingïalang jong ki seng ka liang pyrshah ha ka nongbah jong ka jylla la dep lypa. “Kan sa long ka jingsah kynmaw ha kaba ïadei bad ka jingïalang ban ïakhun pyrshah ïa ka seng BJP,” u la ong. Ïa kane ka jingïalang la thmu ban pynlong hashwa, kata ha ka 12 tarik, Jylliew. Ha kaba ïadei bad kane na ka jingbym lait jong ki katto katne ngut ki nongïalam ban don bynta ha ka jingïalang ba la buh ha ka 12 tarik, la pynkynriah noh ïa ka sha ka 23 tarik, Jylliew. Na ka liang jong u Myntri Rangbah jong ka Tamil Nadu u Stalin u la buh ka jingkyrpad ba la dei ban pynkynriah noh ïa ka tarik ba la buh hashwa. Shuh shuh na ka liang jong u Rahul Gandhi bad u Mallikarjun Kharge ruh ki la pynpaw ba kin ym lait ban ïashim bynta lada buh ïa ka jingïalang ba kan long ha ka 12 tarik, Jylliew. Ha ka taïew ba la lah, u Nitish u la pynshisha da kaba ong ba baroh ki seng jong ka liang pyrshah ki la pyntikna ba kin sa ïashim bynta ha ka jingïalang ka ban sa pynlong ha ka 23 tarik, Jylliew.
