Srinagar, Jylliew:
Ki heh sorkar jong ka Jammu & Kashmir kin sa buh ïa kumba 29 tylli ki CCTV Camera hapoh bad ha baroh sawdong jong ki jaka pyntreikam na ka bynta ki nongleit ïaid riewblei sha Amarnath ha Jammu, la ïathuh ki heh ba dei khmih ha ka lah sngi U Blei.
Ïa ka jingleit ïaid riewblei la thmu ban pynlong naduh ka 1 tarik, Naitung lyngba ka jingïaid ïa ar tylli ki lynti kiba don ha Sonamarg kaba don ha ki bynta ba marpdeng jong ka Kashmir bad ha Pahalgam kaba don ha South Kashmir, la ïathuh ki heh ba dei khmih.
Ka Yatri Niwas Bhagwati Nagar kaba don ha Jammu ka la shah ñiew ba ka la dei ka jaka sah na ka bynta ki nongleit ïaid riewblei na kylleng ki jaka jong ka ri hashwa ba kin leit sha Kashmir na ka bynta ban leit ïuhkjat ha ka krem kaba don ha Amarnath kaba dei ka jaka kyntang kaba don ka jingjrong kaba 3,880-Metre.
Kumba la ïathuh ki heh ba dei khmih, ka Yatri Niwas kan sa don ïa kumba 29 tylli ki CCTV Camera ïa kiba la buh hapoh bad ha sawdong ka thaiñ ha kaba ki la don ruh ar tylli ki Camera kiba don ka jingheh kaba 360-degree.
Kine ki Camera kin sa treikam ha baroh kawei ka thaiñ ha baroh 24 kynta lyngba ka jingpyntreikam kiba da ki kor ki bor ilektrik, ki la ong, ha kaba ki la bynrap shuh shuh da kaba ong ba ki la don ruh kumba saw tylli ki Scanner ki ban khmih bniah ïa ka met jong ki briew ïohba ki buhrieh tiar eiei ne kiwei pat, ïa kiba yn sa buh ha katei ka jaka.
Ka Yatri Niwas ka don ha ka thaiñ Bhagwatinagar jong ka Jammu bad ha kane ka jaka yn sa buh ki jingkhmih bniah ha baroh ki bynta jong ki ïing.
Ka jingpyntreikam na ka bynta ka jingmaramot bad ka jingpynbha ïa ki lynti bad kumjuh kiwei pat ki jingpyndonkam ki la ïaid shakhmat ha kane ka thaiñ, ha kaba la ong ba kine baroh kin sa dep hashwa ka 20 tarik, Jylliew.
Kumba la khmih lynti, la ong ba ka kynhun kaba nyngkong jong ki nongleit ïaid riewblei la khmih lynti ba kin sa mih na ka jaka sah jong ki kaba don ha Jammu shi sngi shwa ban sdang ka Yatra ha ka 1 tarik, Naitung.
