Kolkata, Jylliew:
Ka la don ka jingkawang bom ba la jia ha kaba ka la wanrah ïa ka jingmynsaw jong kiba bun ngut ki briew ha Bhangar ka jaka kaba don ha South 24 Parganas distrik jong ka West Bengal naba ka jingïakynad ka la ïai bteng ha ka sngi kaba 4 jong ka jingleit pynrung kyrteng na ka bynta ka ilekshon Panchayat ha ka jylla.
Kane ka jingjia ka la jia hajan Bijaygunj Bazaar, ka jaka kaba jngai kumba 1km na ka Block Development Office (BDO) ha kaba ka la don ka jingleit pynrung kyrteng.
U MLA jong ka Indian Secular Front (ISF) jong ka thaiñ u la pynbna ba ki kyrtong jong ka seng ki la pynrung kyrteng ha ka sngi Ba-ar.
Kumba la paw ha kawei na ki lad pathai khubor, la ong ba lyngba ka Video la ïohi ba ki pulit bad ki nongthoh khubor ki la phet krad haba la jia ka jingbthei jong ki bom ba la kawang da ki runar ki bym shym la lah ban ithuh.
Ka seng TMC kaba bat ïa ka jingsynshar ha ka jylla bad ka seng ka liang pyrshah ka ISF ki la ïakdew kti markylliang ha kaba ïadei bad ka jingjia ha Bhangar.
Ki jingïakynad ki la mih ha ka thaiñ naduh ka 9 tarik, Jylliew, kaba long ka sngi kaba nyngkong jong ka jingleit pynrung kyrteng na ka bynta ka ilekshon Panchayat ka ban sa long ha ka 8 tarik, Naitung, ha kiba bun ki distrik jong ka jylla ha kaba kane ka dang ïai bteng haduh kine ki sngi.
