Kolkata, Jylliew:
Kawei ka nongbud jong ka seng Trinamool Congress (TMC) ka la mynsaw kumba la pynshisha hadien ka jingshah thombor ha ki nongbud jong ka seng Indian Secular Front (ISF) ha ka por ba ka la don ka jingïakynad ha Bhangar kaba ha West Bengal.
Kane ka jingjia ka la jia ha ka miet jong ka lah sngi U Blei, ha South 24 Parganas distrik. Kumba la ïathuh ka tyllong khubor, la ong ba ka ïing jong u nongbud jong ka seng TMC u Qutubuddin Ali Mollah ha Chaltaberia ruh ka la shah thombor.
Ha ka lah sngi U Blei, kumba la ïoh jingtip la ong ba u Qutubuddin Ali Mollah u la leit na ka bynta ka jingleit pynrung kyrteng. Ka ïing jong u ka la shah thombor bad shah kawang maw ha kaba u la ïoh jingtip halor kane ka jingjia ynda u la leit phai ïing. Ki jinglong jingman ha kane ka thaiñ kumba ka long mynta la ong ba ka la don hapoh ka jingshah tehlakam hadien ba ka kynhun jong ki pulit na Kashipur ki la poi ha katei ka jaka.
Ha ka lah sngi U Blei, ki la don bun tylli ki jingïakynad kiba la jia, ha kaba la ïoh jingtip ba kine ki la jia ha kiba bun ki bynta jong ka West Bengal, naba ki la don ki runar ïa kiba ym shym la lah ban ithuh kiba la leit ban thombor pyrshah ïa ki kyrtong jong ka liang pyrshah katba ki dang don ha ka lynti ban leit thep kyrteng na ka bynta ban ïakhun ïa ka Panchayat ilekshon.
Kumba la sakhi la ong ba ki jingïakynad ki la jia ha Daspur (Paschim Medinipur), Kakdwip (South 24 Parganas), Raninagar (Murshidabad), Saktinagar bad Barshul (both in Purba Bardhaman) bad ha Minakhan (North 24 Parganas), la ïathuh u heh pulit ha ka jingïakren bad ki nongthoh khubor. Ka seng TMC kaba bat ïa ka jingsynshar ha ka jylla ka la kynnoh ïa ki seng ka liang pyrshah ba ki la wan rah ïa ki kynrum kynram hapoh ka thaiñ tang kumno ban pynthut ïa ki rukom pyntreikam ha kaba ïadei bad ka ilekshon bad ban pynthohbria ïa ka jylla namar ba ki sheptieng ba ïoh ki shah rem.
Ki seng ka liang pyrshah kiba kynthup ïa ka seng BJP, Congress, bad CPI(M), ha kawei pat ka bynta, ki la pynshisha ba ki kyrtong jong ki ki la shah khanglad ha ki nongbud jong ka seng TMC na ka bynta ka jingleit thep kyrteng ha kiba bun ki distrik bad mudui ba kam shym la don ka jingpyntreikam ïa ka kynhun shipai ïada jong ka sorkar kmie, ka long kaba eh ban don ka shongsuk-shongsaiñ bad ka ilekshon kaba khuid ha ka jylla.
Ka shlem treikam jong ka seng CPI(M) ha Minakhan kaba don ha Basirhat Subdivision ka la shah pynjulor bad uwei u kyrtong u la shah thombor ha ki runar ki bym shym la lah ban ithuh ha ka por ba u dang leit thep kyrteng, la ïathuh ki heh ba dei khmih.
Sa ha kawei pat ka jingjia kaba la jia ha Sonamukhi ha Bankura distrik, u MLA jong ka BJP u Dibakar Gharami u la pynshisha ba u la shah thombor ha ki runar ki bym shym la lah ban ithuh ha ka por ba u dang thmu ban leit sha ka jaka thep kyrteng. Shi sngi shwa kane, ka State Election Commission (SEC) ka la hukum ïa baroh ki District Magistrates bad ïa ki Superintendents of Police ba kin pynjari da ka kyndon Section 144 jong ka CRPC ha ki jaka kiba jngai kumba 1 km na ki jaka pynrung kyrteng. Ïa ka ilekshon Panchayat la thmu ban pynlong ha ka 8 tarik, Naitung.
