Chennai, Jylliew:
Hadien ba ka la don ka jingleit khynra kaba la neh da kumba 17 kynta, ki heh jong ka kynhun Enforcement Directorate (ED) ki la kem ïa u Myntri ka Electricity, Excise and Prohibition jong ka Tamil Nadu u V.Senthilbalaji ha kaba ïadei bad ka jingjia jong ka jingkamai ïa ka spah bymhok.
Une u Myntri u la shahkem hadien ba la pynlong ïa ka jingleit khynra, haba u la shah ïalam na ka bynta ka jingshah tohkit sha ka jaka treikam jong ka kynhun ED ha ka nongbah Chennai, u la ud shitom ka shadem jong u bad u la shah pynkit sha ICU kaba ha Omandurar Government Multi-Speciality Hospital na ka bynta ka jingshah sumar.
Wat lada kiba bun ki Myntri bad ki MLA jong ka seng kaba bat ïa ka jingsynshar ka DMK bad ki dkhot jong ka seng ki la leit ban jngoh ïa u sha ka jaka ai jingsumar na ka bynta ban tohkit bniah halor ka jingshitom jong u, ka tyllong khubor ka la ïathuh ba u Senthilbalaji u la shahkem.
Ki kaiphot ki la ïathuh ba hadien ka jingshah sumar un sa shah ïalam hapoh ka Principal Sessions Court na ka bynta ban ai hukum halor ki sngi ba un shah set na ka bynta ka jingshah tohkit.
Ki kaiphot ki la ïathuh shuh shuh ba u lah ban shah ïalam ruh sha New Delhi na ka bynta ka jingshah tohkit kaba bniah. Ki la don shibun ki pulit bad ki shipai ka sorkar kmie ïa kiba la shah pyntreikam ha katei ka jaka ai jingsumar.
