New Delhi, Jylliew:
Ha kaba ïadei bad ka jingkhie jong ka ‘erïong Biparjoy, la ong ba ki la don kumba 2 ngut ki briew kiba la ïap bad 22 ngut ki la mynsaw ha Gujarat ha ka sngi Palei. Ha kane ka jingjia la sakhi ba don bun tylli ki dieng kiba la shah jynrat naduh tynrai bad kiba bun tylli ki kali bad ki ïing ki la julor.
Kumba la ïathuh ka tnat ba dei khmih ïa ka jinglong jong ka suiñ bneng, la ong ba ka ‘erïong ka la sdang ban jai jai haba ka la poi ha Rajasthan.
Kumba la ïathuh ka India Meteorological Department (IMD), la ong ba ka ‘erïong Biprajoy kan sa kham jai jai ynda ka la poi ha ki thaiñ Saurashtra bad Kutch kiba ha Gujarat.
Kumba la sakhi, la ong ba ka jingwan jong u slap bad ka lyer kaba jur ka la pynkhyllem ïa palat 524 tylli ki dieng bad kumjuh ïa ki Electric Pole kiba don ha kylleng ki jaka jong ka Gujarat, ha kaba kane ka la long ka daw jong ka jingduh bording jong ki 940 tylli ki shnong, la ïathuh ki heh sorkar ha ka jylla.
Ki arngut kiba la ïap na ka jingthombor ki bor ka mariang ki kynthup ïa ki shikpa-shikhun kiba dei ki nongsharai blang katba ki dang pyrshang ban pyllait ïa ka kynhun jong ki blang kiba la sahkut na ka jingshlei um ha Bhavnagar distrik, la ïathuh ka tyllong khubor ha ka sngi Palei.
Hadien ba ka la paswut tawiar ïa ka Arabian Sea da palat 10 sngi, ka ‘erïong ka la sdang ban hiar ryngkew hajan Jakhau Port ha Gujarat ha ka janmiet jong ka sngi Palei ha ryngkat ka jingbeh jong ka lyer kaba jur kaba la don ïa ka jingthew kaba hadpeng ka 125 kmph bad ka 140 kmph, hynrei ka la nang kham jai jai bad duhbor hadien bun kynta.
Ha ka por 2:30 jong ka step sngi Thohdieng, ka la beh da kumba 100 kilometres ha ka shi kynta.
Ka jinghap jong u slap uba jur kan sa ïai bteng ha Rajasthan, naba ka ‘erïong ka dang ïaleh ban beh sha ki bynta ba Shatei-Mihngi, la ong u Director General jong ka IMD u Dr Mrutyunjay Mohapatra.
Ha ka ba ïadei bad kane, ki bor ba dei khmih ki la buh ki jingmaham ba kin sa nang don ki ïing ki ban sa shah ktah jur na ki jingjulor, kumjuh kin sa nang don shuh shuh ki dieng ki ban sa khyllem namar ka jingïai bteng jong ka jingjur jong ka lyer, ki jingat phyllung ki um duriaw bad ka jingbteng jong ka jinghap u slap uba jur.
Ka sorkar Gujarat ka la ong ba ki la don kumba 1lak ngut ki briew ïa kiba la shah pyllait na ki thaiñ a ap jingma na ka jingktah ka ‘erïong.
Ka sorkar ka la ong ba ki la don kumba 18 tylli ki kynhun jong ka National Disaster Response Force (NDRF) bad 12 tylli jong ka State Disaster Response Force (SDRF) kiba la shah pynap lypa ha ki distrik jong ka Devbhumi Dwarka, Rajkot, Jamnagar, Junagadh, Porbandar, Gir Somnath, Morbi bad Valsad ban pyntreikam ïa ki lada donkam ha kano kano ka por.
Ki shipai kiba la pynkhreh ban ai jingïarap ruh bad ban pynbiang ïa ki jingdonkam lada jia ba wan ka jingshlei um bad kiwei pat ki jingjia ha kine ki jaka ki la sdang ban ai ki jingïarap sha ki nong shong shnong kiba dang don ha ki jaka ba ap jingma naba ka jingpynkynriah jaka ïa ki briew ka dang ïai bteng.
Ki shipai ki la ïatreilang halor kane ka jingthmu bad ki bor sorkar bad kumjuh bad ka kynhun NDRF.
Kumba la khmih bniah, la ong ba kane ka ‘erïong kan sa wanrah ïa kiba bun ki jingjulor ha ki bynta jong ka Kutch, Devbhumi Dwarka bad Jamnagar distrik, la ong ka IMD.
Ka sorkar jylla ka la don jingthmu na ka bynta ban pynphet shnong ïa ki briew kiba shong shnong ha ki jaka kiba jngai kumba 10 km narud duriaw, la ïathuh ki heh ba dei khmih.
Kumba la ïathuh ki heh ba dei khmih, la ong ba ka jingpyntreikam ha kaba ïadei bad ka jingleit pynkynriah jaka ïa ki briew kan sa ïai bteng. Ki ar tylli ki jaka mane blei kiba kham paw nam kiba kynthup ïa ka Dwarkadhish Temple ha Devbhumi Dwarka bad ka Somnath Temple kaba don ha Gir Somnath distrik, ki dang khang na ka bynta ki riewngeit ha ka sngi Palei.
Ka tnat ba dei khmih ïa ka jinglong jong ka suiñbneng ka la ïathuh lypa ba kan sa don ruh ka jinghap jong u slap uba jur ha ryngkat ka lyer kaba jur ha kiba bun ki bynta rudnong jong ka thaiñ Saurashtra-Kutch, khamtam ha ka distrik Kutch, Porbandar bad Devbhumi Dwarka.
