Srinagar, Jylliew:
Ka jingïaid jong ki kali ha ka surok bah Jammu-Srinagar ka la shah ktah jur hadien ba don ka jing-twa khyndew ha ka sngi Palei hajan ka jaka sor ka Ramban, la ïathuh ki heh ka tnat pulit pynïaid kali.
Ka jingtwa khyndew ka la ktah ïa ka surok bah kaba jrong kumba 270-km hajan Cafeteria Morh ha ka por 1 baje mynstep, ha kaba kane ka la khang ïa ka surok kaba la pynïasoh bad ka Kashmir sha kiwei pat ki bynta jong ka ri, la ïathuh ki heh pulit.
Ki la ïathuh ruh ba ka jaka rung jong ka lynti krem ba dang shna ka la shah khang na ka jingtwa. Ïa kane ka lynti krem la shna na ka bynta ban pynkylluid ïa ka surok bad la khmih lynti ban pyndep noh ïa ka ha u snem ban wan.
Hadien ba la jia ka jingtwa khyndew, ki kynhun ba dei khmih ki la pynlong ïa ka jingpyntreikam na ka bynta ban pynkhuid ïa ka jingtwa na ka surok bah kham kloi katba lah na ka bynta ban pyllait ïa ki kali kiba la sahkut lynti.
Kumba ka long haduh hynnin ka sngi ki pulit ka tnat ba dei khmih kim shym shah shuh ïa ki kali ba kin rung na katei ka lynti naba la pyntreikam na ka bynta ban pyllait shwa ïa ki kali kiba la don lypa ha katei ka surok kaba la dap da ka jingtwa bad khang lynti.
