Bengaluru, Jylliew:
U nongïalam jong ka seng Congress u Rahul Gandhi, uba la shah weng noh na ka Parliament hadien ba u la shah rai pynrem ha kaba ïadei bad ka jingshah mudui mukotduma ba u la kren ïa ki kyntien kiba ktah bad pynkhlemraiñ ïa kiwei pat, u la shah khot hajir ha kaba ïadei bad kawei pat ka jingjia jong ka jingkren pyrshah jong u ïa kiwei kaba long pyrshah ïa u ha Karnataka.
Kiwei pat kiba la shah kynnoh lang ha kane ka jingjia kiba kynthup ïa u Myntri Rangbah ka Karnataka u Siddaramaiah bad u Symbud Myntri jong u, u DK Shivakumar ruh ki la shah khot hajir ha u Chief Metropolitan Magistrate.
Ïa kane ka mukotduma yn sa bishar bniah ha ka 27 tarik, Naitung. Katkum ka jingmudui ba la phah da u State Secretary jong ka seng BJP u Keshavaprasad ha ka 9 tarik, Jymmang, la ong ba la don ka jingkynnoh pyrshah ba la don kumba 40 percent ka jingbamsap kaba la long hashwa ban kut ka jingpynlong ïa ka ilekshon Assembly.
Ka la pynshisha da kaba ong ba ka seng Congress ha ka jingpynbna jong ka ba la buh ha ki kot khubor, ha ka 5 tarik, Jymmang, 2023 la pynshisha ba ka sorkar BJP ka la klop ïa kumba 40 percent bad lute kumba T. 1.5 lak klur ka pisa ha ki saw snem ba la leit.
Kum ka jingpynshisha ba kane ka jingkynnoh ka dei kaba khlem nongrim, ka seng BJP ka la pynshisha da kaba ong ba dei da kum kine ki jingkren pyrshah ba la kren ha ka por ba la don ki jingïalap ilekshon ba ka la shah rem ha ka ilekshon ba la long ha u bnai ba la lah ha Karnataka.
