Guntur, Jylliew:
Kum ka lad na ka bynta ban kham pyntngen na ka jingshit kyrang jong ka sngi ha kane ka aïom, kiba bun ki briew ki la leit ban ngam ha ka wah Krishna bad ha kaba ïadei bad kane, ki bor ba dei khmih ki la shimkhia na ka bynta ban khmih bniah khamtam hadien ka jingngam jyllop jong kiba bun ngut ki briew ha kane ka wah.
Kumba la ïathuh la ong ba ki la don kumba 8 ngut ki briew kiba la ngam jyllop ha ka wah Krishna kaba hap hapoh ka jingkhmih jong ki pulit ka Tadepalli ha kine ki ar bnai ba la leit. Ki briew khamtam ki khynnah pule, kiba ju kwah ban leit jngi na ka bynta ban kham tngen na ka jingshit kyrang jong ka sngi ki ju leit sha kane ka wah kaba long ha ki jaka kiba don jingma naba kim tip ïa ka jingkhlaiñ ka bor tan jong ka um ha kaba kane ka la pynlong ïa ki ba kin duhei ïala ka jingim.
Kum shi bynta ban lah ban leh ei ei halor kane, hapoh ki jingai hukum jong u Superintendent of Police jong ka Guntur distrik u Arif Hafeez, ki pulit jong ka Tadepalli ki la pynjur ïa ka jingpyntreikam ban pynjur ïa ka jingpahara bad buh ruh ïa ki Signboard ha kaba la mana ïa ki nongleit jngi ha ki rud wah bad khang pyrshah ïa ki briew ba kin rung ha ki jaka kiba ap jingma. Haduh mynta, ki heh pulit ki la batai ba ki la lah ban ithuh ïa kumba 36 tylli ki jaka kiba ap jingma ha shi lynter jong ka wah.
