New Delhi, Jylliew:
Ka jingpynkylla kyrteng ïa ka Nehru Memorial Museum and Library Society ha Delhi sha ka Prime Ministers’ Museum and Library Society ka la wanrah biang ïa ka jingïapher jingmut hapdeng ka seng BJP bad ka Congress.
Ka jingpynkylla kyrteng ïa ka Museum ha Teen Murti Bhavan ka la long shi snem hadien ba ïa ka Pradhanmantri Sangrahalaya la plie ha ka phyllaw jong kajuh ka ïing, ha kaba ka la long ka jaka sah jong u Myntri Rangbahduh uba nyngkong duh jong ka ri u Jawaharlal Nehru, la ïathuh ka tyllong khubor.
Ki nongïalam jong ka seng Congress kiba kynthup ïa u Mallikarjun Kharge bad u Jairam Ramesh ki la kynnoh ba u Myntri Rangbahduh u Narendra Modi bad ka seng jong u ka la pyrshang ban pynduh noh ïa ki matti ba la wanrah da u Myntri Rangbahduh uba nyngkong jong ka ri.
“Kito ki bym don bynta ei ei ban pynsahnam ne ban don ha ka khana pateng ki ju pyndam noh ïa kajong kiwei pat. Kane ka jingthmu kaba sniew tam ban pynkylla noh ïa ka kyrteng jong ka Nehru Memorial Museum and Library kam long ka jingibeiñ ïa ka jingim jong u Pandit Jawaharlal Nehru, u nongpynwan dur ïa ka India kaba mynta bad u nongïada u bym don jingtieng na ka bynta ka synshar paidbah,” la ong u Kharge ha ka jingthoh kaba u la phah lyngba ka Twitter.
“Kane ka pyni ïa ka jingtlot jong ka jingmut jingpyrkhat bad ka jingkwah ban synshar donbor jong ka seng BJP bad ka RSS,” u la ong, ha kaba u la kdew kti ruh ïa ka kynhun kaba ju ai buit ai bor ïa ka seng BJP ka Rashtriya Swayamsevak Sangh (RSS).
U Ramesh u la kynthoh jur ïa ka jingthmu jong u Myntri Rangbahduh u Modi ba ka la long kum ka jingleh kaba u sngew kum u “Vishwaguru”. “… Kaei kaba um lah ban leh la ka long ha ka ban pynjah, ban kynthoh bad ban pynduh pyndam ïa ka kyrteng jong u nongbuh nongseng jong ka ri India? Une u riewpawnam u la shah leh donbor ha ka jingbym don bor sngewthuh bad ka jingbym sngewskhem jong u briew (Modi) uba la kam ïalade ba u long u nonghikai jong ka pyrthei ne ka ri ïa kaba la buh da u kum u Vishwaguru,” la ong u Ramesh.
Ka seng BJP ka la pynksan ha kaba ïadei bad ka jingpynkylla ïa ka kyrteng jong ka Museum bad ong ïa ka seng Congress ba ka la dei ban sangeh noh ha kaba ïadei bad ka jingleh kam saiñ pyrthei halor kane ka bynta.
Shuh shuh na ka liang u heh nongïalam jong ka seng BJP u JP Nadda u la kynthoh jur ïa ka seng Congress ha kaba u la ong ba u la leh kam saiñ pyrthei ha kaba ïadei bad kane ka bynta.
U la ong ba ki dang don shuh shuh ki nongïalam nalor kine kiba la paw ba ki la don bynta ban shakri bad ban thaw ïa ka ri.
“Ka PM Sangrahalaya ka dei kaba la wanrah shabar jong ka kam saiñ pyrthei bad ka seng Congress kam lah ban pynshisha ei ei halor kane,” la ong u Nadda.
U MP jong ka BJP u Neeraj Shekhar u la ong ba ka seng Congress kam ju peit shuh shabar lada kim dei na ka longïing jong ki Gandhi.
“U Kpa jong nga ruh, u la long u Myntri Rangbahduh barim u Chandra Shekhar une u la trei ruh na ka bynta ka jingbha bad ka jingmyntoi jong ka ri. U la trei ruh bad ka seng Congress hynrei kim don jingkheiñ ei ei namar ba um dei na ka longïing ne ka jait ka kynja jong ki. Mynta haba u Myntri Rangbahduh u Narendra Modi u la thmu ban burom ïa baroh ki Myntri Rangbahduh jong ka ri kiba na kiwei kiwei ruh ki seng saiñ pyrthei, ka seng Congress ka la pyrshah,” la ong u Neeraj Shekhar ha ka jingphah jingthoh lyngba ka Twitter.
Ka seng BJP ka la pynshisha da kaba ong ba ka seng Congress kam shym sngewthuh wat haduh u pud ba ka la ñiewbeiñ ïa ki nongïalam lajong kiba la shakri ïa ka kam kum ki Myntri Rangbahduh.
U nongaiktien jong ka seng BJP u Sudhanshu Trivedi u la ong ba ka seng Congress ka la buh ka jingkynnnoh ba wat ki nongïalam jong ka kim pat ju leit rung hapoh katei ka Museum ban peit haduh katno ka jingnohsynñiang bad ka jingtreishitom jong u Jawaharlal Nehru bad jong kiba la mih bujli hadien jong u ki la lah ban leh kham bha shuh shuh da kaba ki la pyndonkam ïa ki buit ki bor kiba thymmai.
Ïa ka jingthmu ban pynkylla kyrteng la rai ha ka jingïalang ba la pynïaid da u Myntri ka tnat ïada ri u Rajnath Singh, uba la long u Vice President jong ka Society, la ong ka Culture Ministry.
