New Delhi, Jylliew:
U Myntri uba dei khmih ïa ka tnat Environment jong ka Delhi u Gopal Rai u la ong ba ka sorkar ka la dep ban pyntreikam ïa kumba 33 tylli ki kynhun ki ban khmih bniah ïa ki jaboh ba pynmih na ki karkhana, katba 259 tylli ki kynhun ki la shah pyntreikam na ka bynta ban khmih bniah ha kaba ïadei bad ka jingbret jaboh jong ki karkhana.
Ha ka por ba la pynlong ïa ka jingïalang halor kane ka bynta ha ki taïew ba la lah, u Rai u la hukum ïa ka Delhi Pollution Control Committee (DPCC) ba kan pynkhreh ha kaba ïadei bad ka jingpyntreikam na ka bynta ban pynkhuid ïa ki jaboh, ha kaba la hukum ba la dei ban pyntikna ha ka ban pynkhuid ïa ki jaboh jong baroh ki karkhana ha Delhi bad la dei ban pyntreikam kumba la buh da ka sorkar.
Kumba la sakhi, la ong ba ki jaboh ba la pynmih na ki karkhana ki la jur bha bad kane ka ju wanrah ki jingeh ha kiba bun ki liang bad buh jingma ïa ka koit ka khiah jong ki briew.
U Rai u la ong ba ki jingthew ki la dei ban long shi bynta jong ka 14-point Summer Action Plan (SAP) ha kaba ïadei bad ka jingpynjaboh ïa ka lyer, ïa kaba la wanrah da u Myntri Rangbah u Arvind Kejriwal ha ka 1 Jymmang.
“Ka SAP ka la pynpaw ïa ka jinglah jong ngi ban pyntreikam ha kaba ïadei bad ka jinglong jong ka lyer ha Dehli da kaba khmih bniah lang bad ki rukom pyntreikam ha ka jingpynkhuid ïa ki jaboh. Hapoh ka jingtreikam jong ka Industrial Pollution Campaign, ki la don kumba 141 tylli ki kynhun kiba dei ban leit shang sha kylleng ki jaka kiba kynthup ïa ki 472 ngut ki briew ki ban khmih bniah ha kaba ïadei bad ki rukom bret jaboh jong ki karkhana ha ka shi sngi katba 108 tylli ki kynhun kaba kynthup ïa ki 397 ngut ki briew ki ban khmih bniah ha ka por mynmiet. Ha ryngkat kine, 33 tylli ki kynhun, kiba kynthup ïa ki heh jong ka DPCC bad ka Delhi State Industrial and Infrastructure Development Corporation (DSIIDC), ki la shah pyntreikam na ka bynta ban bteng ha ka ban khmih bniah ïa ki karkhana. Kine ki kynhun kin sa khmih bniah ïa ki karkhana ha Delhi bad ban pyntreikam kyrkieh na ka bynta ban tehlakam ha kaba ïadei bad ka jingjur ka jingjaboh,” la ong u Rai.
