Mumbai, Jylliew:
Ha ki hynriew bnai ba la leit, ka kynhun Anti-Narcotics Cell (ANC) jong ki pulit ka Mumbai ki la ïoh ban kurup ïa u jingdih pynbuaid uba 777 kilogram, ïa uba la kot sha palat T. 25 klur bad ïoh ruh ban kem ïa 97 ngut ki briew kiba la rah ïa ki song jong u jingdih pynbuaid, la pynshisha ki heh pulit.
Tang u Mephedrone la ïoh ban kurup da T. 15.93 klur, kaba kiwei pat ki kynthup ïa ki bilor dawai, ki LSD, ki Hydroponic Weed, Chara bad u Heroin, la ïathuh u heh pulit.
Napdeng kiba la shahkem, 38 ngut ki dei kiba la shah pynshisha ba ki dei ki snar nongïalam ha kane ka kam ha kaba la ïoh ban kurup ïa u drok uba la kot sha ka T. 19.11 klur bad kumba 17 tylli ki jingjia la lah ban buh jingmudui pyrshah ïa ki, la ïathuh shuh shuh u heh pulit.
Kiba la shahkem ki kythup ïa 8 ngut kiba dei ki nong Africa, u la bynrap.
“Ki la don baroh kumba 97 ngut ki briew ïa kiba la ïoh ban kem da ka kynhun tohkit ha ki 56 tylli ki jingjia bad 777 kilo u drok uba la kot sha ka T. 25.40 klur la ïoh ba kurup haduh mynta ha une u snem,” u la bynrap.
