Patna, Jylliew:
Ka seng Bharatiya Janata Party (BJP) ka la pynjur ka jingkynthoh ïa u Myntri Rangbah jong ka Bihar u Nitish Kumar hashwa ban don ka jingïalang jong ki seng ki bym dei jong ka seng BJP ïa kiba u la thmu ban pynlong ha Patna ha ka sngi Thohdieng na ka bynta ban pynkhreh ïa ka jingïakhun ïa ka ilekshon ka ban sa long ha u snem 2024.
U Samrat Choudhary, uba dei u heh nongïalam jong ka BJP ha Bihar, hynnin ka sngi u la kynthoh halor ka jingpynbna jong u Kumar uba la thmu ban pynïar ïa ka kynhun Myntri hadien ka jingïakynduh bad u President jong ka seng Congress u Akhilesh Singh.
U dkhot jong ka seng BJP ha Parliament u Sushil Kumar Modi u la kynthoh da kaba ong ba ka jingïalang ka ban long ha Patna kam don ei ei hynrei ka jingïalang jong ka bamsap, ka rukom synshar bad halor ki nongïalam jong ki kynhun jaitbynriew.
Na ka liang u Myntri barim jong ka sorkar kmie bad u MP jong ka seng BJP, u Ravishankar Prasad u la ong ba ka jingïalang ha Patna kan ym don jingmut ei ei.
Hynrei na ka liang ki seng ka liang pyrshah kumba ki la dep ban pynpaw, ki la ong ba ka jingïalang ha Patna ka long kaba donkam bad kaba don jingmut.
