New Delhi, Jylliew:
Ki la don bun bun ngut ki briew kiba la ïap ha ki lai tylli ki jylla kiba kynthup ha Uttar Pradesh, Bihar bad Odisha ha kine ki lai sngi ba la leit na ka jingsuba ba ka la dei na ka daw jong ka jingjur palat ka jingshit jong ka sngi, la ïathuh ki doktor na katei ka thaiñ. Nangta ki heh ba dei khmih ïa ka jinglong jong ka suiñbneng ki la buh jingmaham jur ha kaba ki la ong ba ka jingshit kan sa ïai bteng ha kiba bun ki bynta jong ka ri.
Ha Uttar Pradesh bad Bihar, kynthup ha Ballia kaba don ha UP kumba la batai da ka District Hospital la ïoh jingtip ba ki la don kumba 83 ngut ki briew kiba la ïap naduh ka 11 tarik, Jylliew, ha kaba 44-54 ngut ki dei ki briew kiba ka jingshitom jong ki ka la nang jur na ka daw jong ka jingshit jong ka sngi.
U slap ha kine ki jaka um pat hap kumba la khmih lynti, ha kaba la batai da ka India Meteorological Department (IMD) ba un sa hap ha kine ki sngi ban sa wan. Ha Bihar, ki la don kumba 45 ngut ki briew kiba la ïap bad ha Odisha haduh ba la thoh ïa ka khubor dang don tang uwei, ha kaba la ong ba ki la don 20 ngut kiba la ïap hynrei ym pat lah ban pynshisha ba ka jingïa jong ki ka la dei ne em na ka jingshit jong ka sngi.
U Chief Medical Superintendent (in-charge) ha ka Ballia Hospital, u Dr SK Yadav, u la ong, “Ha ka 15 tarik, Jylliew, ki la don kumba 154 ngut ki nongpang kiba la shah pynkit sha ka jaka ai jingsumar, bad 23 ngut napdeng kine ki la ïap noh ha katei ka sngi. Ha ka sngi kaba bud kata ha ka 16 tarik, Jylliew, ki la don sa kumba 137 ngut kiba la shah pynkit sha ka jaka ai jingsumar ha kaba na kine ki la don kumba 20 ngut kiba la ïap.”
Ha kaba ïadei bad kawei pat ka kaiphot, ba la wanrah da u Chief Medical Officer u Jayant Kumar ïa kaba la phah sha u Ballia District Magistrate u Ravindra Kumar ha ka sngi U Blei, la ong ba ka jingïap jong ki briew ha kajuh ka por ka la long 83 ngut. Ka kaiphot kam shym la batai shai ba ka jingïap jong ki briew ka dei ne em na ka jingjur jong ka jingshit ka sngi.
“Ki la don baroh kumba 44 ngut ki briew kiba la ïap na ka daw ba ki la shah ktah na ka jingjur jong ka jingshit bad kiwei pat na ka jingshah ktah ha kiwei pat ki jingpang, katba 39 ngut ki la ïap na ka daw ba ki la jur ki jingshitom ba bun jait kiba la ktah ïa ki,” la ong ka kaiphot.
Ha kaba ïadei bad kane ka bynta, na ka liang jong ki doktor bad ki jaka ai jingsumar kin sa khmih bniah ha kaba ïadei bad ki jait jingshitom jong ki nongpang kiba shah ktah na ka jingshit jong ka sngi, katba ki heh ba dei khmih ki la dei ban long kiba husiar bad pynjur ïa ka jingkhmih bniah.
Wat lada haduh mynta ym pat lah ban pynshai lut la baroh ki briew kiba la ïap ki dei ne em na ka daw jong ka jingshit palat jong ka sngi, kiba bun ki doktor ïa kiba ym shym la pynpaw kyrteng, ki la ong ba kiba bun ki briew kiba la ïap ki don ïa ka jingpang na ka daw jong ka jingshit ka sngi.
Ki heh ba dei khmih ki la shah bthah ba kin khmih bniah ïa ka jinglong jong ka umbam-umdih ha kylleng ki jaka.
Ha ka sngi U Blei, ka Ballia ka la ïoh ïa ka jingshit da 43.5°C, kaba la kiew sha ka 6 degress kumba ka dei ban long manla u snem ha kum kine ki por, la ong ba ka jingshit jong ka sngi kan sa ïai neh ha ki khyndiat sngi ban wan. Ka jingshit jong ka sngi ha Bihar, ka la long 45°C ha ka sngi U Blei.
