Bengaluru, Jylliew:
Ka jingpynrung kyrteng na ka bynta ka skhim ‘Gruha Jyoti’ ka ban pynïoh bording ei sha ki nongshong shnong haduh 200 Units sha baroh ki longïing ha Karnataka ka la poi sha ka 55,000 ngut ha ka sngi U Blei haduh ka por 6 baje janmiet kaba long tang ha ka sngi kaba nyngkong jong ka jingpynrung kyrteng, la ïathuh ka tnat Electricity Department.
Ïa ka jingpynrung kyrteng la leh ha ki Centre kiba la tip kum ka Karnataka One, Grama One bad Bengaluru One kiba don ha kylleng ka jylla, la ïathuh shuh shuh ka tnat ba dei khmih. Ka tnat ba dei khmih ka la pynshai ba ym donkam kot sakhi ha kaba ïadei bad kane ka jingpynrung kyrteng bad kaba donkam ka long tang ka ban pynrung kyrteng hapoh ka Gruha Jyothi Scheme bad kiba dei ban ïoh jingmyntoi ki la donkam ban pyndonkam da ka Mobile Phone jong ki, ka Laptop ne na kino kino ki Internet Café.
