New Delhi, Jylliew:
Ka Supreme Court hynnin ka sngi ka la ai jingbit na ka bynta ban pynkynriah ïa u Myntri jong ka Tamil Nadu uba la shahkem u V Senthil Balaji ba un shah sumar ha ka jaka ai jingsumar jong ki riewshimet.
U Balaji, ïa uba la shahkem ha ka kynhun Enforcement Directorate, u dang shah sumar mynta ha ka jaka ai jingsumar jong ka sorkar kaba don ha Chennai. Ka kynhun Enforcement Directorate, kaba la kem ïa u Balaji ha kaba ïadei bad ka jingjia jong ka jingshah kynnoh bamsap na ka jingthung kam ha ka State Transport Department, ka la leit sha ka Supreme Court ban pyrshah halor ka hukum jong ka Madras High Court.
Ka High Court ka la ai jingbit na ka bynta ban pynkynriah jaka ha ka ban sumar ïa u Balaji. Ka kynhun nongbishar jong ka Supreme Court ba la khlieh da u Justice Surya Kant bad u Justice M M Sundresh ka la ong ba ka jingkyrpad ka dang sah khlem pat bishar bniah ha High Court bad bthah ïa ka kynhun ED ba kan leit ban mih sha ka ïingbishar. U Bajali, uba long u Myntri ba dei khmih halor ka Electricity and Prohibition and Excise jong ka Tamil Nadu, u la shahkem ha ka 14 tarik, Jylliew hapoh ka jingtreikam jong ka Prevention of Money Laundering Act (PMLA).
