Kolkata, Jylliew:
Ki pulit jong ka West Bengal ha ka sngi Ba-ar ki la buh ka jingmudui pyrshah ïa u Commandant bad ïa u Inspector jong ka tnat Border Security Force (BSF) hapoh kiba bun ki kyndon jong ka Indian Penal Code (IPC) bad ka Code of Criminal Procedure (CrPC) halor ka jingkynnoh ba ha ka por ba ki la don bynta ha ka jingleit pahara ki leh bym suitñiew ïa ki pulit ka thaiñ ba don ka jaka treikam jong u BDO ha Cooch Behar distrik.
Kane ka dei ka sien kaba nyngkong ha kaba ka la don ka jingmudui kaba long pyrshah ïa ki BSF da ki pulit ka jylla. Ka jingmudui ka la long pyrshah ïa u Commandant ki BSF u Sanjay Singh bad u Inspector Kushal Rawat halor ka jingmudui jong u pulit uba la shah pyntreikam ha ka jaka pynrung kyrteng jong ki kyrtong ban ïakhun ïa ka Panchayat ilekshon ha ka thaiñ.
Ha ka step jong ka sngi ba-ar, ka ïingbishar bahakhlieduh ka la pynsangeh shwa halor ka rai jong ka Calcutta High Court, na ka bynta ban pyntreikam ïa ka kynhun shipai ka sorkar kmie ha Bengal ha ka por ba don ka ilekshon. Ha ka hukum jong ka, ka Supreme Court ka la tangon tyngeh ïa ka State Election Commission (SEC) bad ong ba ka jingpynlong ilekshon kam dei ka daw ban wanrah ïa ki jingkulmar ne ki jingïakynad.
