New Delhi, Jylliew:
Kumba la sakhi hynnin ka sngi, la ong ba na ka jingrakhe ïa ka International Yoga Day, ka jingkilan met ïa kaba la tip da baroh kum ka Yoga kaba la ju rakhe ha ka 21 tarik, Jylliew, la shem ba ha kylleng ki bynta jong ka ri la don kiba bun ki prokram ïa kiba la ïashim bynta da ki khun bapher bapher kynthup ki ‘riew paidbah.
Kumba la tip, la ong ba ka jinglah ban leh Yoga ka ïarap ïa baroh ka jingtreikam ki dkhot met ha ka met jong u briew. Ka pynïoh ïa ka koit ka khiah kaba long ha ka bor met, ka bor pyrkhat bad ka mynsiem. Ïa ka International Day of Yoga la tyrwa nyngkong ban wanrah da u Myntri Rangbahduh ka ri u Narendra Modi, ha ka por ba u la ai jingkren ha ka United Nations General Assembly kaba la long ha u Nailur jong u snem 2014, haduh une u snem uba mynta kane ka jingrakhe ka la long ha ka sien kaba 9.
