Aurangabad, Jylliew:
Ki 11 ngut ki nongbylla kiba la shah pyntrei ha ka ban tih ïa ka pung bad shah teh kynjri khnang ba kin ym lait ban phet ki la shah pyllait noh ha ki pulit jong ka Osmanabad distrik, ha Maharashtra, la ïathuh u heh pulit ha ka sngi Ba-ar. Hadien ba ki la shah pyllait ha ka sngi Saitjaiñ, kine ki nongbylla ki la ïathuh ba ki la shah pyntreikam da kumba 12 kynta man ka sngi, ha kaba kim shym ïoh ka bainong, ki ju ïoh ruh ka jingbam ban bam tang shisien shi sngi. Ha kaba ïadei bad kane ka jingjia, ki pulit ki la ïoh ban kem ïa saw ngut ki briew, kynthup ar ngut ki kontraktor, ka jingtohkit ïa kine ka dang ïaid shakhmat.
Kine ki nongbylla ki la shah pyntreikam ha ki ar ne lai bnai ba la leit ha ka ban tih pung ha ka shnong Khamaswadi bad Wakharwadi ki jaka kiba hap hapoh ka jingkhmih jong ki pulit ka Dhoki ha Osmanabad ha kaba ki la shah pynshitom beiñ, la ong u Assistant Police Inspector u Jagdish Raut ha ka jingïakren bad ki nongthoh khubor.
