New Delhi, Jylliew:
U Myntri Rangbah jong ka Delhi u Arvind Kejriwal u la phah shithi sha u Lieutenant Governor, ha kaba u la kyntu ba la dei ban leh ei ei ha kaba ïadei bad ka jingjia jong ki kam beaiñ ba shyrkhei kiba la jia ha ka nongbah ha kaba ki la don kumba 4 ngut ki briew kiba la shah pynïap tang ha ki 24 kynta.
U Kejriwal u la kynthoh jur ïa ka Ministry of Home Affairs (MHA) bad ïa u Lieutenant Governor halor ka jingbym lah jong ki ban shim ki sienjam na ka bynta ban khanglad ïa ki kam thombor kiba long pyrshah ïa ki kynthie.
Ha ka shithi kaba u la phah, u Kejriwal u la ai jingmut ba ka la dei ban don ka jingpyntreikam pyrkhing jong ki pulit bad ban pynlong ka jingleit pahara ha ka por mynmiet ha ryngkat ka jingïatreilang jong ki nongshong shnong ka Delhi khnang ban lah ban kham pynkhlaiñ ïa ki jingtreikam jong ki bor ka aiñ bad ban wanrah ïa ka jingshngaiñ.
