New Delhi, Jylliew:
Ka kynhun Cyber Cell jong ki pulit ka Delhi ha ka sngi Balang ki la pynshisha da kaba ong ba ki la ïoh ban pdiang ïa ka Call na u briew u bym shym la lah ban ithuh uba la byrngem ban pynïap ïa u Myntri Rangbahduh u Narendra Modi, u Myntri ka sorkar kmie uba dei khmih ïa ka tnat ki kam pohïing u Amit Shah bad u Myntri Rangbah jong ka Bihar u Nitish Kumar.
Kumba la ïathuh ka tyllong khubor, la ong ba kane ka khubor pyntriem la ïohpdiang da ka kynhun pyntreikam jong ki pulit ka Delhi kaba shabar ka distrik, ha kaba hadien kane ka la don ka jingpynklaiñ ïa ki jingpyntreikam. Ar tylli ki Call la ïoh ban pdiang da ka Police Control Room, ha kaba la lap ba la dei da ujuh u briew ha kaba haduh mynta ym pat lah ban ithuh ïa u. Ka jingtohkit bad ka jingwad bniah ban lap bad ïoh kem ïa une u briew ka dang ïai bteng haduh mynta.
