Nongstoiñ, Jylliew 22:
Ka jingïai bteng jong ka jinghap slap ha kine ki sngi ka la pynlong ïa ka surok ‘subway’ ha kawei na ki bynta ha ka surok Nongstoiñ-Kynroh-Wahkaji ba kan dkut thui noh na ka jingshah rong ha ka um. Kane ka la pynlong ruh ban sahkut ka ïaid ka ïeng hapdeng ki paidbah.
Ka jingdkut jong katei ka ‘subway’ ka dei ha kawei na ki jaka ba shna ïa ka jingkieng ha Kynroh hajan jong ka Nongkynjang Sub-center Nongkynjang.
Na ka liang ka Federation of Khasi Jaiñtia & Garo People (FKJGP) Lai Lyngdoh Area Unit ka la pynpaw ïa ka jingsngewdiew kaba jur ïa ka jingleh suki palat jong ka kompeni (Russian Based Campany, Vozrozhdenie) kaba pyntrei ïa ka surok Nongstoiñ sha Wahkaji kaba la wanrah syndon ka jingdkut.
U Bah Nestor Nongkseh, President FKJGP Lai Lyngdoh Area Unit u la ong, katei ka surok ka dei kaba pynïasoh ïa ki bun tylli ki shnong jong ka thaiñ Lai Lyngdoh bad ïa ka South West Khasi Hills kiba pyndonkam man la ka sngi. Kane ka la pynlong ban ktah jur ïa ki khynnah skul kiba wan pule ha ki skul ba don ha Kynroh ha kaba wat tang ka lynti ïaid kjat ruh ka la kham shitom khamtam ha kane ka aïom.
Kumta ka seng ka kyntu jur ïa ka tnat PWD ba ka dei ban khmih ba kan shimkhia halor kane bad ïa ka kompeni ba ka dei ban shna noh mardor ban pynïoh ïa ka surok ban weng ïa ka jingsohsat ki paidbah.
Shuh shuh la ong ruh ba la ïohi lypa ba ki jingma ba ap shuh shuh ïa ki paidbah nongleit nongwan ym tang na katei ka jingkieng, ki dang don bun ki subway ba ka kompeni ka la shna, kin sa khyllem ba kan long ka jinglynga bad jingma ïa ki paidbah wat tang na Nonglwai shaduh Nongstoin khlem da kren shaduh Wahkaji.
