Nongpoh, Jylliew 20
Khyndai sngi hadien ba uwei u rangbah na ka shnong Ummar ïa uba la tip kyrteng kum u Carlus Tron ba ju khot ieid u Jack, u la jah rngai kyndit kyndit ha ka por ba hiar na kali ban leit shabar harud surok bah National Highway 6 kaba dang hap ha ki thaiñ Umran, ki bahaïing bahasem bad ki paidbah nongshong shnong tad haduh mynta ka sngi ki la dang ïai sah ha ka umdum bad sngew kut lad kut lynti ban wad ïa utei rangbah.
Kum ban shu pyn-kynmaw, u Bah Carlus Tron ha ka step jong ka 11 tarik u bnai Jylliew u la mih na la ïing ha shnong Ummar jong ka thaiñ Western Ri Bhoi ban leit buh ïa la ka lok kaba armet sha Ganesh Das Hospital, Shillong ryngkat bad ka kiaw kurim bad ha ka janmiet pat jong kane ka kajuh hi ka sngi, u la thmu ban leit phai biang sha shnong Ummar ryngkat ka kiaw kurim bad ar ngut kiwei pat ki nongshong shnong ka Ummar kiba leit shaw ïa u.
La ïathuh ba ha ka por janmiet kaba dei ban leit phai na Shillong, mar ïa poi ha ki bynta jong ka thaiñ Umran, u Bah Carlus Tron u la phah sangeh ïa ka kali ha ka por kumba 8:00 baje duna eiei bad hiar ban leit shabar. Dei tad naduh kane ka khyllip mat ba u la jah rngai syndon khlem ïohi shuh shaei u don bad ka phone ka jong u ruh ka la lip noh artat.
Na ka liang ka kiaw kurim ha ryngkat bad kitei ar ngut kiba ïadon lang, ki la leit ban pyntip ïa kane ka jingjia sha thanat Umsning ha katei ka juh hi ka miet.
Haba ïoh ban ïakren mynta ka sngi bad u Bah Andrias Tron uba long kum u para jong u Bah Carlus Tron, u la ïathuh ba naduh katei ka sngi ba buh ïa ka jingujor, ki bor pulit ka thanat Umsning kim shym la ai jingtip satia ïa ki halor kumno ki la buddien ban wad ïa utei u rangbah uba la jah bad pynpaw ruh ba na ka liang jong ka kur bad ka shnong Ummar hi da ka jingsngewkhia kim banse ban hap pynkut noh ïa ka jingwad ïa u Bah Carlus namar ka jingduk jingkyrduh bad ka jingsngew kut lad kut lynti.
U Bah Andrias u la pynpaw ruh ba kumba na ka liang ka kur bad ka shnong Ummar ki la rai ban pynsangeh noh ïa ka jingwad ïa u Bah Carlus, ka jingkyrmen ka jong ki mynta ka dei satang ha ka sorkar ba kan leh eiei ban buddien bad shimkhia ban wad ïa utei u rangbah uba la shu jah rngai syndet syndet.
Ha kajuh ka por, u Bah Andrias u la buh ruh ka jingkyntu bad kyrpad sha ki paradoh parasnam kiba ïohi ne lap ïa u Bah Carlus Tron ba kin sngewbha ban pyntip lem sha ki bahaïing bahasem da kaba phone ha une u number +91 8131945570.
