New Delhi, Jylliew:
Ka kynhun National Investigation Agency (NIA) ha ka sngi Balang ka la kem ïa u nongïarap ba ïajan jong u runar uba dang shah set patok u Lawrence Bishnoi halor ka jingshah kynnoh ba u la donkti ban ai jaka sah bad jingïada ïa ki nongïarap jong ki lehnoh ha kaba ïadei bad ka jingthombor ïa ka jaka treikam jong ki pulit ka Punjab ha u snem ba la lah.
Une uba la shahkem u dei uba la tip kyrteng kum u Vikas Singh, u nongshong shnong jong ka Lucknow ha Uttar Pradesh, u la shahkem namar ba u la shah kynnoh ba u la ai ka jaka sah bad ka jaka riehtngen ïa u Deepak Surakhpur bad u Divyanshu jong ka Faizabad kiba la siat da u Rocket-Propelled Grenade (RPG) ban thombor ïa ka jaka treikam jong ki pulit ha Mohali ha u bnai Jymmang jong u snem 2022, la ïathuh u nongaiktien jong ka kynhun National Investigation Agency.
“U Singh u la phla ba u la ai jaka sah ïa u Surakhpur bad u Divyanshu ha ka ïingsah jong u kaba don ha ka shnong Devgarh, Ayodhya bad ha ka ïing Flat jong u kaba don ha Gomti Nagar Vistar, Lucknow, da bun bun sien,” la ong u heh ka kynhun NIA.
