Bhubaneswar, Jylliew:
U Myntri Rangbah ka Odisha u Naveen Patnaik ha ka sngi Palei u la mang ïa ka pisa kaba T. 2.49 klur na ka bynta ban shna ïa ka Bahanaga High School, kaba la shah pynpra na ka bynta ban pynlong jaka tep ïa ki briew kiba la ïap na ka jingjia tyngkhuh jong ki rel ha Balasore.
Ïa kane ka pisa la mang na ka Chief Minister’s Relief Fund (CMRF), la ong ka jingthoh ba la phah da ka Chief Minister’s Office (CMO).
Ïa ka rai na ka bynta ban pynpra ïa katei ka skul, la shim hadien ba ka la don ka jingïalang jong ka School Managing Committee (SMC) ha kaba la ong ba kane ka skul ka la rim bha bad ka bym buh jingshngaiñ shuh na ka bynta ki khynnah skul bad ba ki khynnah kim kwah shuh ban pule ha kane ka skul ba la pynlong jaka tep ïa ki briew kiba la ïap, la ïathuh ki heh sorkar.
Ha kaba ïadei bad ka rai jong ka SMC bad ka jingkyrpad jong ki bahaïing jong ki khynnah skul bad ki nongshong shnong, na a liang u Patnaik u la pynlong ka jingïalang bad ki heh sorkar, kynthup u Chief Secretary, bad la mang ïa ka pisa na ka bynta ban shna noh da kawei pat ka skul kaba thymmai, la ïathuh shuh shuh ki heh sorkar.
