Vijayawada, Jylliew:
Ka Myntri kaba dei khmih ïa ka tnat Tourism, Culture, Sports and Youth Welfare ka R K Roja ka la dep ban pynbna ban shna ïa ki 7-star Hotel ha Visakhapatnam, Rajahmundry, Tirupati, Horsley Hills bad Gandikota. Ïa kane ka jingthmu pyntreikam la mang ba kan long ha ka jinglut kaba T. 1,350 klur hapoh ka jingtreikam ka PPP Mode, ha ryngkat ka jingïatreilang bad ka Oberoi Group. Kane ka jingpyntreikam kumba la ïohi la ong ba kan sa aikam aijam ïa kumba 10,900 ngut ki samla jong ka jylla, ka la bynrap.
Ka Myntri ka la ong, “Ngi la dep ban ïasoi ïa kumba 123 tylli ki soskular kiba la kot sha ka T. 21,941 klur ha ka Tourism and Hospitality Sector ha ka Global Investors Summit. Kane ka jingthmu pyntriekam ka la buh ha ka bynta kaba kyrpang bha ha kaba ïadei bad ki kam jngohkai pyrthei. Ka la aikam aijam sha kumba 41,412 ngut ki samla ha ka jylla. Ngin sa wanrah ruh ïa ki Water and Adventure Sports ha ki 21 tylli ki jaka kiba don ha ka jylla. Ki la don kumba 100 tylli ki Tourist Information Centres ki ban sa buh lyngba ka Spark Cyber Tech Limited ha ki jaka ba la mut kiba don ha ki jaka ba don ki jaka mane blei,” ka la ong.
“Ka jylla AP ka la wan ha ka kyrdan kaba lai ha kaba ïadei bad ka jingdon jong ki jaka mane blei kiba long ha kajuh ka por ki jaka jngohkai pyrthei. Kum shi bynta na kane, ka srokar kmie ka la mang da kumba T. 54.05 klur na ka bynta ban wanrah ïa ki kam pynroi ha Simhachalam bad T. 54.17 klur na ka bynta ka Annavaram Temple. Ki Guest Housekin sa don ha kumba 50 tylli ki jaka bad ha ki jaka mane blei kiba long ha kajuh ka por ki jaka jngohkai pyrthei kiba don ha Tirupati bad kumjuh ka jaka jngohkai pyrthei kaba don ha Visakhapatnam. Ngin sa kyntiew ha kaba ïadei bad ki jingpyntreikam ïa ki lieng ha ki 50 tylli ki jaka,” ka la ong.
