Shillong, Jylliew 25:
U MLA bad MDC ka Mawhati, Bah Charles Marngar u la pynsngew ba kumba 22 tylli ki shnong kiba hap ha ka thaiñ Block-II ba shong ba sah da ki Khasi, ki kwah ban don beit ha Meghalaya bad na ka liang ki nongshong shnong ki la soi lang ruh ïa kawei ka rai ba kin don ha kane ka Jylla.
U Bah Charles uba dei ruh u dkhot ka Regional Committee na ka bynta ka jingpynbeit pud ha ka wat ka ba-ar, u la ong ba donkam ban kham ïoh ka por na ka bynta ban lum bad pynbiang ïa ki kot ki sla khnang ban ïoh wanrah ha ka jingïalang jong ka Regional Committee ka ban sa long biang.
U la ong ba la pynsngew ha ka jingïalang jong ka Regional Committee kaba dang shu dep long shen kaba long Chairman da u Symbud Myntri Rangbah u Bah Prestone Tynsong khnang ba ka jingïakren pynbeit pud ha ka wat ba-ar bad ka Assam kan khlaiñ bad ban nym duh ïa ki jaka ki puta.
U Bah Charles u la ong ba ki jingpynsngew jong ki nongshong shnong la phah ruh sha ka Regional Committee kaba khlieh da u Bah Prestone.
U Bah Charles uba dei ha kajuh ka por u MDC ka Mawhati bad uba dang shu shimti shen kum u Deputy Chairman ka KHADC, u la ong ba u kwah ba ka Executive Committee jong ka KHADC kan wan jngoh ïa ki jaka ha khappud ha kaba u long uba kloi ban kdew khnang ban sngewthuh ïa ka jinglong jingman ha ki jaka khappud. U Bah Charles u la ong ba ka KHADC ka la phah ruh ka shithi sha ka Karbi Anglong Autonomous Council halor ka jinglong jingman ka suk ka saiñ ha ka thaiñ Block-II. U Bah Charles u la kular ruh ba un ïakhun ba ym dei ban shu shahjem ha ka Assam haba ïadei bad ki jaka ki puta ha khappud.
Kum ban pynkynmaw, u Bah Charles um shym la shah kynthup lang ha ka Regional Committee kaba dei ïa ki jaka ha Ri-Bhoi na ka bynta ka jingpynbeit pud ha ka wat banyngkong.
