Shillong, K’lyngkot 19
U Symbud Myntri Rang-bah ka Jylla, Bah Prestone Tynsong ha ka Sngi Saitjaiñ u la ong ba ka jingtreikam jong ki Autonomous District Council (ADC) ha Meg-halaya ka la kham khlaiñ bad kham janai hadien ka jingwan jong ka Sorkar MDA ha ka bor naduh u snem 2018.
Haba kren ha ka Dorbar Iktiar Paidbah ba la pynlong da ka Khasi Hills Autonomous Dis-trict Council (KHADC) ha Polo, u Bah Prestone u la ong ba ka dei ka sien ba nyngkong ba un ïohi ïa kum kane ka jingïalang kaba heh ba la pynlong ban aiti ïa ki syrnot sha ki bor synshar shnong hapoh u pud u sam ka KHADC.
U la ïaroh ïa u Lat ka Jylla u CH Vijayashankar namar ka jingai jingmynjur ïa ki ‘Bill’ bapher-bapher kiba sahteng jong ka KHADC. U la ong ruh ba wat la u Lat u dang shu wan dang khyndiat bnai sha Meghalaya hynrei u la ai ïa ki jingmynjur ïa bun tylli ki ‘Bill’ kiba la kylla long ki aiñ mynta.
U Bah Prestone u la ong, “Shwa u snem 2018, ki don ki ‘Bill’ kiba la mynjur da ki ADC kiba la jah noh ha lynti ban poi sha Secretariat bad ki don ki khep ba ki MDC ki klet wat ïa ka tarik kaba ki la ai jingmynjur ïa kita ki ‘Bill’ hynrei hadien u snem 2018, ki ‘Bill’ kiba la mynjur da ki ADC ki poi kloi sha Secretariat namar na ka por sha ka por ka tnat DCA jong ka Sorkar Jylla ka la khot ïakren bunsien bad baroh ki ADC halor ki mat kiba ïadei bad ki Bill.”
Haba pynkynmaw ïa ka jingjia ha u snem 2014 ha kaba ka ïingbishar High Court kam shym la ithuh ïa ka bor jong ki Rangbah Shnong, u Bah Prestone u la ong, “Ka la don ka jingïalang paidbah ha kane kajuh ka jaka ban ïakren halor katei kajuh ka mat, na ka liang ka Sorkar Jylla bad KHADC ngi la kyndit bynriew bad kane ka la ïalam ngi ban shna bad thaw ïa ki katto-katne ki aiñ. Kum kane ka jingjia ka jia ban pynlong ïa ngi ban ïoh jinghikai khamtam ïa ki ADC bad ïa ka Sorkar Jylla ba kaei-kaei kaba ngi leh, ngi dei ban leh katkum ka aiñ”.
Shuh-shuh u la ong ba ka Land Bill kaba long mynta ka Land Act jong ka KHADC ka pynskhem ïa ka jinglong trai khyndew ha ka jylla khamtam ha ka rilum Khasi.
“Ngi dei ban kynmaw ba ka rai jong ka Supreme Court ha u snem 2019 shuwa ba ka KHADC ka wanrah ïa ka Land Act, ka la kdew ba ha Meghalaya namar ba ki jaka ki dei ki jong ki ‘riewshimet, ki Hima, ki Raid, ki Kur, ka Supreme Court ka la pynmih ïa ka rai ba ym dei tang ka khyndew ka shyiap, wat ki marpoh khyndew ruh ki dei jong ki trai jaka,” u la ong.
