Bengaluru, Jylliew:
U nongïalam ba pawkhmat jong ka seng BJP u B S Yediyurappa u la buh ka jingmaham pyrshah ïa ka sorkar Congress ha Karnataka ba ka seng jong u kan sa pynlong ïa ka jingïakhih ba la tip kum ka ‘Satyagraha’ ha baroh ar kata hapoh bad habar jong ka Assembly, lada jia ba kam lah ban pynurlong ïa ki san tylli ki jingkular ba la buh ha ka por ba don ka ilekshon bad ban phah mih noh ïa ka lada kam lah ban pynurlong ïa ki jingkular ba ka la khlei.
Kine ki jingkren ki long shi bynta ban dawa ïa ka sorkar jylla ba ka la dei ban pynbiang bad pynurlong ïa ki jingkular ha ka por ilekshon kumba ka la khlei sha ki paidbah.
U Myntri Rangbah barim u la ong ruh ba un sa pynlong ïa ka jingïakhih hakhmat jong ka Vidhana Soudha, ha Legislature bad Secretariat ha Bengaluru.
U la kynthoh jur ïa u Myntri Rangbah ka jylla u Siddaramaiah bad ïa ka sorkar jong u kaba la shu pynrem ïa ka sorkar kmie ha kaba ïadei bad ka jingsam khaw lyngba ka “Anna Bhagya” Scheme ha ka jylla ha kaba la ong ba kane ka dei ka jingkren ka bym lah ban map bad ka jingshet kylla ïa ki paidbah.
